Category: निर्वाचन गतिबिधी

काठमाडौँ, मंगलबार, १७ मङ्सिर २०८१ । हुम्लाको सर्केगाड गाउँपालिकाको उपाध्यक्षमा नेकपा (माओवादी केन्द्र) की देवकी तिमल्सिना निर्वाचित भएकी छन् । उनी कांग्रेसकी सविता बुढालाई ४३ मतले हराउँदै निर्वाचित भएकी हुन् ।

निर्वाचित भएकी तिमिल्सिनाले एक हजार ६३७ मत पाइन् । उनकी निटतम प्रतिद्वन्द्वी बुढाले एकहजार ५९५ मत ल्याइन् । तेस्रो भएकी एमालेकी जाना शाहीले ११ सय ३२ मत ल्याइन् ।

त्यस्तै, राप्रपाकी संगीता शाहीले ५१ तथा राष्ट्रिय स्वतन्त्र पार्टी (रास्वपा) की बाँचा बुढाले २५ मत ल्याइन् ।

०७९ मा माओवादीका चन्द्रसिंह कार्कीले तीन हजार २६९ मत ल्याएर निर्वाचित भएका थिए ।

गोरखा, सोमबार, १७ मङ्सिर २०८१ । गोरखा नगरपालिका–५ को वडाध्यक्षमा नेपाल कम्युनिष्ट पार्टी (माओवादी केन्द्र) का बिष्णुबहादुर रानामगर विजयी हुनुभएको छ । आइतबार सम्पन्न भएको उपनिर्वाचनमा रानामगरले ४ सय ८६ मत प्राप्त गर्दै निर्वाचित हुनुभएको हो ।

उहाँका निकटतम प्रतिस्पर्धी नेपाली काग्रेसका भाइकाजी आलेले ४ सय २ मत प्राप्त गर्नुभएको मुख्य निर्वाचित अधिकृत शिवबहादुर रानभाटले जानकारी दिनुभयो । त्यस्तै नेकपा एमालेकी उमेद्वार दुर्गामाया राना थापाले ३ सय ४५ मत प्राप्त गर्नुभयो ।

कुल २ हजार २ सय २५ मतदाता रहेको उक्त वडामा १ हजार ३ सय ७३ मत खसेको थियो । खसेको मतमध्ये १८ मत बदर भएको उहाँले बताउनुभयो । उपनिर्वाचनमा बिभिन्न ९ राजनीतिक दलका ९ जना उमेद्वार प्रतिस्पर्धामा रहेका थिए ।

गत २०७९ वैशाखमा सम्पन्न भएको स्थानीय तहको निर्वाचनमा वडाध्यक्षमा विजयी हुनुभएका नेकपा एमाले खिलबहादुर रानामगरको निधन भएपछि यस वडामा रिक्त रहेको पदमा आइतबार उपनिर्वाचन भएको हो ।

काठमाडौँ, सोमबार, १७ मङ्सिर २०८१ । काठमाडौँ महानगरपालिका वडा नम्बर १६ को वडाध्यक्षमा राष्ट्रिय स्वतन्त्र पार्टी (रास्वपा) की रोजिना श्रेष्ठ विजयी हुनु भएका छन् ।

निर्वाचन आयोगका अनुसार उहाँले एक हजार ५८४ मत प्राप्त गर्नुभयो । प्रतिद्वन्द्वी नेपाली काँग्रेसका देवेन्द्र पाठकले एक हजार ३०४ मत प्राप्त गर्नुभयो । उता नेकपा (एमाले) का लक्ष्मी रत्न तुलाधरले एक हजार ११८ मत प्राप्त गर्नुभएको छ ।

स्थानीय तहमा यो रास्वपाको पहिलो जीत हो । यस अघि यस क्षेत्रमा काँग्रेस विजयी भएको थियो । काङ्ग्रेसबाट निर्वाचित मुकुन्द रिजालको निधन भएपछि यहाँ उपनिर्वाचन भएको हो ।

काठमाडौँ, सोमबार, १७ मङ्सिर २०८१ । दैलेखको महाबु गाउँपालिकाको अध्यक्षमा नेकपा एमालेका जंगबहादुर शाही विजयी भएका छन् ।

यसअघि कांग्रेसले जितेको यो पालिका अध्यक्षमा उपनिर्वाचन हुँदा एमालेले खोसेको हो । यससँगै कर्णालीमा एमालेले स्थानीय तहमा एक सिट थपेको छ ।

एमालेका शाहीले ३१२७ मत ल्याएर विजयी हुँदा कांग्रेसका झलकबहादुर भण्डारी २६७५ मत ल्याएर दोस्रो भए भने माओवादीका जंगबहादुर बरालमगरले ८४२ मत पाए । रास्वपाका प्रकाशकुमार बुढाले ११२ मत मात्रै पाए ।

एमालेबाट निर्वाचित भएका शाही यसअघि एकीकृत समाजवादीको केन्द्रीय सदस्य एवम् दैलेख जिल्ला अध्यक्ष थिए । उनी उपनिर्वाचनअघि मात्रै एमालेमा फर्किएर टिकट पाएका हुन् ।

बि स २०७४ सालको स्थानीय तहको निर्वाचनमा एमालेबाट सोही पालिकामा अध्यक्ष जितेका उनी पार्टी विभाजनपछि एकीकृत समाजवादीतिरमा लागेका थिए ।

बि स २०७९ को स्थानीय तहको निर्वाचनमा एकीकृत समाजवादीबाटे उठेका उनी २२६८ मत ल्याएर तेस्रो भएका थिए ।

गोरखा, आइतबार, १६ मङ्सिर २०८१ । गोरखा नगरपालिका–५ को वडाध्यक्ष पदमा हुने उपनिर्वाचन अन्तर्गत आइतवार मतदान हुदैछ । बिहान ७ बजेदेखि साँझ ५ बजेसम्म मतदानको समय तोकिएको छ । उपनिर्वाचनको सम्पूर्ण तयारी पूरा भइसकेका छन् । मतदान स्थल र केन्द्रहरु शनिवार नै तयार गरिएको मुख्य निर्वाचन अधिकृत शिवबहादुर रानाभाटले बताए ।

स्वाँराको गोरखकाली र अमराईको शिवशक्ति आधारभूत बिद्यालयलाई मतदान स्थल तोकिएको उनले जानकारी दिए । ‘कुल दुई वटा मतदान स्थल हो,’ उनले भने, ‘मतदान केन्द्र भने तीन वटा छन् ।’ शिवशक्ति आधारभूत बिद्यालय भएको मतदान स्थलमा क र ख गरी दुई वटा मतदान केन्द्र रहेको उनले बताए ।

निर्वाचन आयोगले गत कात्तिक २७ गते प्रकाशत गरेको अन्तिम मतदाता नामावली अनुसार उक्त वडामा २ हजार २२५ मतदाता छन् । १ हजार ५०१ जना मतदातालाई शिवशक्ति आवि र बाँकी ७ सय २४ मतदातालाई गोरखकाली आवि मतदान स्थल तोकिएको छ ।

चुनावलाई स्वच्छ र निष्पक्ष रुपमा सम्पन्न गर्न आफूहरु लागिपरेको प्रमुख जिल्ला अधिकारी पुण्यबिक्रम पौडेलले बताए । मौन अवधिको समयलाई मध्यनजर गर्दै व्यापक रुपमा सुरक्षा टोली परिचालन गरिएको उनले जानकारी दिए । ‘चुनावमा नेपाल प्रहरीसँगै सशस्त्र प्रहरी परिचालन हुन्छ,’ उनले भने, ‘आवश्यक परे थप मद्दतको रुपमा सेना पनि परिचालन गर्न सक्छौँ ।’

वडा प्रवेश गर्ने नाकाहरुमा चेकजाँच बढाइएको जिल्ला प्रहरी प्रमुख एसपी वासुदेव पाठकले बताए । अवाञ्छित गतिविधि हुन नदिन टोल टोलमा प्रहरी पनि परिचालन गरिएको उनले जानकारी दिए ।

दुवै मतदान स्थलहरुको शनिवार मुख्य निर्वाचन अधिकृत, प्रमुख जिल्ला अधिकारी, सुरक्षा निकायका प्रमुख लगायतका टोलीले अनुगमन तथा निरीक्षण समेत गरेका थिए । आज सो वडाक्षेत्रभित्र विना पासका सवारी संचालन गर्न नपाइने बताइएको छ ।

यसअघिका वडाध्यक्ष स्व. खिलबहादुर रानाको २०७९ साल कात्तिक १० गते निधन भएपश्चात रिक्त रहेको वडाध्यक्ष पदमा उपचुनाव हुन लागेको हो । चुनावमा नौ दलका उम्मेदवार बीच प्रतिस्पर्धा हुदैछ । चुनावलाई मध्यनजर गर्दै गोरखा नगरपालिकाले आईतबार सार्वजनिक बिदा समेत दिएको छ । गण्डकी प्रदेशभर गोरखा ५ एक मात्र उपनिर्वाचन हुन लागेको क्षेत्र हो । वडाकै भएपनि यो चुनावलाई दलका मुख्य नेताहरुले आफ्नो राजनीतिक प्रतिष्ठासँग जोडेर हेर्ने गरेका छन् ।

काठमाडौँ, आइतबार, १६ मङ्सिर २०८१ । स्थानीय तहको उपनिर्वाचनअन्तर्गत आज (आइतबार) मतदान हुँदै छ । स्थानीय तहका रिक्त विभिन्न ४१ पदका लागि आज मतदान हुन लागेको हो । निर्वाचन आयोगले उपनिर्वाचनको सम्पूर्ण तयारी पूरा भएको जनाएको छ । निर्वाचन हुने सम्बन्धित स्थानीय तहमा स्थापना गरिएका मतदान केन्द्रमा आज बिहान ७ देखि अपराहृन ५ बजेसम्म मतदान हुनेछ । नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि उपनिर्वाचन हुन लागेको हो ।

उपनिर्वाचन हुने सम्बन्धित स्थानीय तहमा सम्पूर्ण तयारी पूरा भएको निर्वाचन आयोगका सहसचिव एवं प्रवक्ता नीता पोख्रेल अर्यालले जानकारी दिनुभयो । गर्भवती, अपांगता भएका व्यक्ति, ज्येष्ठ नागरिक, बिरामी, किरियापुत्री, सुत्केरी तथा अन्य (लैंगिक तथा यौनिक अल्पसंख्यक) मतदातालाई प्राथमिकताका आधारमा मतदान गर्ने व्यवस्था मिलाइएको उहाँले जानकारी दिनुभएको छ । प्रवक्ता अर्यालका अनुसार मतदाता नामावलीमा नाम समावेश भएका मतदाताले आयोगबाट जारी भएका मतदाता परिचयपत्र, नेपाली नागरिकताको प्रमाणपत्र, राष्ट्रिय परिचयपत्र, राहदानी, स्थायी लेखा नम्बर परिचयपत्र वा सवारी चालक अनुमति पत्रको सक्कल प्रमाणका आधारमा मतदान गर्न पाउनेछन् ।

कीर्तिपुर नगरपालिकाको प्रमुख र जाजरकोटको नलगाड नगरपालिकाको उपप्रमुख, मोरङको ग्रामथान र दैलेखको महाबु गाउँपालिकाका अध्यक्ष, दोलखाको गौरीशंकर, रुकुम (पूर्वी भाग) पुथा उत्तरगंगा, हुम्लाको सर्केगाड र बाजुराको स्वामीकार्तिक खापर गाउँपालिका उपाध्यक्ष पदका लागि निर्वाचन हुँदै छ । ताप्लेजुङको सिरिजंगा गाउँपालिका-३, झापाको कन्काई नगरपालिका-६, तेह्रथुमको लालिगुराँस नगरपालिका-८, सुनसरीको गढी गाउँपालिका-६, ओखलढुंगाको मोलुङ गाउँपालिका-५, उदयपुरको त्रियुगा नगरपालिका–१२ र बेलका नगरपालिका-९, सप्तरीको डाक्नेश्वरी नगरपालिका-१ र ४, धनुषाको धनुषाधाम नगरपालिका-१, महोत्तरीको रामगोपालपुर नगरपालिका-२, रौतहतको ईशनाथ नगरपालिका-७, रौतहटका राजपुर नगरपालिका-६ र गढीमाई नगरपालिका-८ मा निर्वाचन हुँदै छ ।

काठमाडौंको काठमाडौं महानगरपालिका-१६, कीर्तिपुर नगरपालिका-१ र ४, नुवाकोटको ककनी गाउँपालिका-२, मकवानपुरको हेटौँडा उपमहानगरपालिका-१२, गोरखाको गोरखा नगरपालिका-५, गुल्मीको मुसिकोट नगरपालिका-१, कपिलवस्तुको शुद्धोधन गाउँपालिका-१, रोल्पाको रुण्टीगढी गाउँपालिका-४, बर्दियाको ठाकुरबाबा नगरपालिका-४ र रुकुम (पश्चिम भाग)को सानीभेरी गाउँपालिका-५ वडाध्यक्ष पदका लागि निर्वाचन हुँदै छ । यस्तै, दैलेखको दुल्लु नगरपालिका-१३, जाजरकोटको कुसे गाउँपालिका-७, कालीकोटको तिलागुफा नगरपालिका-४, डोल्पाको त्रिपुरासुन्दरी नगरपालिका-५, बझाङको सूर्मा गाउँपालिका-४, डोटीको पूर्वीचौकी गाउँपालिका-६, दार्चुलाको दुहुँ गाउँपालिका-५ र कञ्चनपुरको भीमदत्त नगरपालिका-६ मा निर्वाचन हुन लागेको निर्वाचन आयोगले जनाएको छ ।

निर्वाचनमा ३७६ उम्मेदवार प्रतिस्पर्धामा रहेका छन् । उपनिर्वाचनमा विभिन्न २० राजनीतिक दल र स्वतन्त्र उम्मेदवारले प्रतिस्पर्धा गर्दै छन् । यसअघि जिल्ला समन्वय समिति ओखलढुंगा र कैलालीका प्रमुखमा क्रमशः नेपाली कांग्रेसका उम्मेदवार टेकराज भट्टराई र टीकाकुमारी चौधरी (भूल) तथा रुकुम (पूर्वी भाग) पुगा उत्तरगंगा गाउँपालिका-२ मा नेकपा माओवादी केन्द्रका जगत घर्ती निर्विरोध निर्वाचित भइसकेका छन् । उपनिर्वाचनका लागि मंसिर २ गते उम्मेदवारी दर्ता भएको थियो ।

मत परिणाम वेबसाइटमै
निर्वाचन आयोगले मतदान कार्य सम्पन्न भई सबै मतपेटिका तोकिएको मतगणनास्थलमा संकलन भएपछि मतगणना कार्य प्रारम्भ हुने जनाएको छ । मतगणनाको अद्यावधिक परिणाम आयोगको बेवसाइटमा हेर्न सकिने आयोगले जनाएको छ । आयोगले मतदाता नामावलीमा नाम भएका सम्बन्धित निर्वाचन क्षेत्रका सम्पूर्ण मतदाताले आफूलाई मन परेको उम्मेदवारलाई मतदान गरी आफ्नो मताधिकारको प्रयोग गर्न आहृवान गरेको छ । मतदाताले मतदान केन्द्रमा आफूलाई प्राप्त मतपत्र लिई गोप्य मतदान कक्षमा गएर मन परेको कुनै उम्मेदवारको चिहृन भएको कोठामा स्वस्तिक छापले मत संकेत गर्नुपर्छ । मतपत्र च्यातिएमा, मतदान अधिकृतको हस्ताक्षर नभएमा, दुईवटा निर्वाचन चिहृन रहेको कोठाको बीचमा पर्नेगरी मत संकेत गरेमा, स्वस्तिक छाप नबुझिने गरी लतपतिएमा, निर्वाचन चिहृन रहेको कोठाभन्दा बाहिर मत संकेत गरेमा वा मतपत्रमा स्वस्तिक छापबाहेक औँठा छाप, हस्ताक्षर आदिले मत संकेत गरेमा मत बदर हुने आयोगले स्पष्ट पारेको छ ।

सोमबार नै सबै ठाउँको नतिजा आउने
निर्वाचन आयोगले मंसिर १६ गते अर्थात् आज हुन लागेको उपनिर्वाचनको मतपरिणाम भोलिपल्ट वा मंसिर १७ गते सोमबार सार्वजनिक गरिसक्ने जनाएको छ । उपनिर्वाचन हुने ३४ वडामा त्यसैदिन मतगणना सुरु भइसक्ने र कतिपय पालिकामा भने उपनिर्वाचन भएको दोस्रो दिनबाट मात्रै मतगणना सुरु हुने भए पनि त्यसैदिन मतगणना कार्य सम्पन्न हुने प्रमुख निर्वाचन आयुक्त दिनेशकुमार थपलियाले जानकारी दिनुभयो । मतगणना गर्दा कानुनी व्यवस्थाअनुसार सर्वदलीय सहमतिअनुसार गर्नुपर्ने भन्दै राजनीतिक दल र उम्मेदवारका प्रतिनिधिले निर्वाचन अधिकृतले भने अनुसारको काम गरेमा, विवाद नगरेमा मतपत्र सजिलो र निर्वाचन भएकै ठाउँमा मतगणना हुने भएकाले मतगणना भोलिपल्ट नै सकिने उहाँको दाबी छ । मतपरिणाम सार्वजनिकको विषयमा जानकारी दिँदै प्रमुख निर्वाचन आयुक्त थपलियाले भन्नुभयो, ‘निर्वाचन आयोगको तयारीअनुसार उपनिर्वाचनको सम्पूर्ण नतिजा आउन उपनिर्वाचन भएको दिनदेखि पर्सि भन्ने हुँदैन । भोलि त हुने नै भयो । तर, यसमा यो राजनीतिक दल र उम्मेदवारको प्रतिनिधिको सहयोग, समन्वय र व्यवहारमा निर्भर हुन्छ ।

काठमाडौं र कीर्तिपुरमा बाहेक ३४ वडा वडामा त्यसै दिन सुरु हुन्छ । प्रमुख, उपप्रमुख, अध्यक्ष र उपाध्यक्षको पालिकाको केन्द्रमा ल्याउनुपर्छ ।’ प्रमुख निर्वाचन आयुक्त थपलियाले मतपत्र एकदमै सजिलो र हरेक उम्मेदवारको मतपत्र छुट्टाछुट्टै रहेकाले मतगणना गर्न पर्याप्त टोली परिचालन गरिएका कारण मगणनामा ढिलाइ नहुने दाबी गर्दै भन्नुभयो, ‘काठमाडौंबाहेक सबै स्थानमा मतगणना एकै चरणमा सकिन्छ । काठमाडौंमा भने एकै चरणमा नसकिन सक्छ । यसमा एउटा त हाम्रा निर्वाचन अधिकृतको कार्यालय सम्बन्धित वडामा नै स्थापना भएका छन् । वडामा जम्मा गरेर त्यसै दिन मतगणना सुरु हुन्छ ।’ मतगणनाको नतिजा प्रत्येक दुई घण्टाको फरकमा आयोगकै वेवसाइटमार्फत सार्वजनिक गर्ने तयारी रहेको जानकारी दिँदै थपलियाले भन्नुभयो, ‘आयोगले दुई–दुई घण्टामा मतपरिणाम सार्वजनिक गर्ने भनेर हरेक मतगणना स्थलमा एक-एकजना कम्प्युटर अपरेटर खटाएका छौँ । मतगणना स्थलबाट नतिजाको विवरण राख्नेबित्तिकै आयोगको वेबसाइटबाट सार्वजनिक हुन्छ ।’

गौरीशंकरबाट हेलिकोप्टरमा मतपेटिका ल्याइने
निर्वाचन आयोगले दोलखाको गौरीशंकर गाउँपालिकामा मतदान सकिएपछि पालिकाको केन्द्रमा मतपेटिका ल्याउनका लागि हेलिकोप्टरको प्रयोग गर्नुपर्ने देखिएको जनाएको छ । गाउँपालिकाको केन्द्रदेखि वडा कार्यालय धेरै टाढा रहेकाले हेलिकोप्टरमार्फत नै मतपेटिका ल्याउनुपर्ने अवस्था देखिएको र त्यसको तयारी अघि बढाइएको प्रमुख निर्वाचन आयुक्त थपलियाले जानकारी दिनुभयो । प्रमुख आयुक्त थपलियाले भन्नुभयो, ‘दोलखाको गौरीशंकर गाउँपालिकामा हेलिकोप्टरबाटै मतपेटिका ल्याउनुपर्ने अवस्था देखिएको छ । हेलिकोप्टर प्रयोग नगर्दा करिब १२ देखि १३ घण्टा लाग्ने अवस्था छ । सबै मतपेटिका जम्मा नगरेर गणना गर्न नसकिने हुँदा केही समय लाग्नसक्छ । अन्य सबै पालिकाको त्यसैदिन सुरु हुन्छ ।’ प्रमुख निर्वाचन आयुक्त थपलियाले गौरीशंकरपछि रुकुम पूर्वको पुथा उत्तरगंगा गाउँपालिकाका वडा पनि केही टाढा रहेकाले गणना सुरु गर्न केही समय लाग्ने देखिएको जानकारी दिनुभयो । यद्यपि, त्यसै दिनको राति अबेरसम्म भने गणना भइसक्ने उहाँको दाबी छ ।

काठमाडौँ, शनिबार, १५ मङ्सिर २०८१ । स्थानीय तहका रिक्त विभिन्न ४१ पदका लागि भोलि आइतबार मतदान हुँदैछ । निर्वाचन आयोगले उपनिर्वाचनको सम्पूर्ण तयारी पूरा भएको जनाएको छ ।

निर्वाचन हुने सम्बन्धित स्थानीय तहमा स्थापना गरिएका मतदान केन्द्रमा भोलि बिहान ७ देखि अपराह्न ५ बजेसम्म मतदान हुनेछ । नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि उपनिर्वाचन हुन लागेको हो ।

उपनिर्वाचन हुने सम्बन्धित स्थानीय तहमा सम्पूर्ण तयारी पूरा भएको निर्वाचन आयोगका सहसचिव नीता पोख्रेल अर्यालले राससलाई जानकारी दिनुभयो । गर्भवती, अपाङ्गता भएका व्यक्ति, ज्येष्ठ नागरिक, बिरामी, किरियापुत्री, सुत्केरी तथा अन्य (लैङ्गिक तथा यौनिक अल्पसङ्ख्यक) मतदातालाई प्राथमिकताका आधारमा मतदान गर्ने व्यवस्था मिलाइएको उहाँले बताउनुभयो ।

आयोगका प्रवक्तासमेत रहनुभएकी अर्यालका अनुसार मतदाता नामावलीमा नाम समावेश भएका मतदाताले आयोगबाट जारी भएका मतदाता परिचयपत्र, नेपाली नागरिकताको प्रमाणपत्र, राष्ट्रिय परिचयपत्र, राहदानी, स्थायी लेखा नम्बर परिचयपत्र वा सवारी चालक अनुुमति पत्रको सक्कल प्रमाणका आधारमा मतदान गर्न पाउनेछन् ।

कीर्तिपुर नगरपालिकाको प्रमुख र जाजरकोटको नलगाड नगरपालिकाको उपप्रमुख, मोरङको ग्रामथान र दैलेखको महाबु गाउँपालिकाका अध्यक्ष, दोलखाको गौरिशङ्कर, रुकुम (पूर्वी भाग) पुथा उत्तरगङ्गा, हुम्लाको सर्केगाड र बाजुराको स्वामीकार्तिक खापर गाउँपालिका उपाध्यक्ष पदका लागि निर्वाचन हुँदैछ ।

ताप्लेजुङको सिरिजङ्गा गाउँपालिका वडा नं ३, झापाको कन्काई नगरपालिका वडा नं ६, तेह्रथुमको लालिगुराँस नगरपालिका वडा नं ८, सुनसरीको गढी गाउँपालिका वडा नं ६, ओखलढुङ्गाको मोलुङ गाउँपालिका वडा नं ५, उदयपुरको त्रियुगा नगरपालिका वडा नं १२ र बेलका नगरपालिका वडा नं ९, सप्तरीको डाक्नेश्वरी नगरपालिका वडा नं १ र ४, धनुषाको धनुषाधाम नगरपालिका वडा नं १, महोत्तरीको रामगोपालपुर नगरपालिका वडा नं २, रौतहतको ईशनाथ नगरपालिका वडा नं ७, रौतहटका राजपुर नगरपालिका वडा नं ६ र गढीमाई नगरपालिका वडा नं ८ मा निर्वाचन हुनेछ ।

काठमाडौँको काठमाडौँ महानगरपालिका वडा नं १६, कीर्तिपुर नगरपालिका वडा नं १ र ४, नुवाकोटको ककनी गाउँपालिका वडा नं २, मकवानपुरको हेटौँडा उपमहानगरपालिका वडा नं १२, गोरखाको गोरखा नगरपालिका वडा नं ५, गुल्मीको मुसिकोट नगरपालिका वडा नं १, कपिलवस्तुको शुद्धोधन गाउँपालिका वडा नं १, रोल्पाको रुन्टीगढी गाउँपालिका वडा नं ४, बर्दियाको ठाकुरबाबा नगरपालिका वडा नं ४ र रुकुम (पश्चिम भाग)को सानीभेरी गाउँपालिका वडा नं ५ वडाध्यक्ष पदका लागि निर्वाचन हुँदैछ ।

दैलेखको दुल्लु नगरपालिका वडा नं १३, जाजरकोटको कुसे गाउँपालिका वडा नं ७, कालीकोटको तिलागुफा नगरपालिका वडा नं ४, डोल्पाको त्रिपुरासुन्दरी नगरपालिका वडा नं ५, बझाङको सूर्मा गाउँपालिका वडा नं ४, डोटीको पूर्वीचौकी गाउँपालिका वडा नं ६, दार्चुलाको दुहुँ गाउँपालिका वडा नं ५ र कञ्चनपुरको भीमदत्त नगरपालिका वडा नं ६ मा निर्वाचन हुने निर्वाचन आयोगले जनाएको छ ।

निर्वाचनमा तीन सय ७६ उम्मेदवार प्रतिस्पर्धामा हुनुहुन्छ । उपनिर्वाचनमा विभिन्न २० राजनीतिक दल र स्वतन्त्र उम्मेदवारले प्रतिस्पर्धा गर्दै हुनुहुन्छ ।

यसअघि जिल्ला समन्वय समिति ओलखढुङ्गा र कैलालीका प्रमुखमा क्रमशः नेपाली कांग्रेसका उम्मेदवार टेकराज भट्टराई र टीकाकुमारी चौधरी (भूल) तथा रुकुम (पूर्वी भाग) पुगा उत्तरगङ्गा गाउँपालिका वडा नं २ मा नेपाल कम्युनिष्ट पार्टी (माओवादी केन्द्र)का जगत घर्ती निर्विरोध निर्वाचित भइसक्नुभएको छ । उपनिर्वाचनका लागि मङ्सिर २ गते उम्मेदवारी दर्ता भएको थियो ।

मत परिणाम वेबसाइटमा हेर्न सकिने

मतदान कार्य सम्पन्न भई सबै मतपेटिका तोकिएको मतगणनास्थलमा सङ्कलन भएपछि मतगणना कार्य प्रारम्भ हुनेछ । मतगणनाको अद्यावधिक परिणाम आयोगको बेवसाइट धधध।चभकगति।भभिअतष्यल।नयख।लउ मा हेर्न सकिने आयोगले जनाएको छ ।

आयोगले मतदाता नामावलीमा नाम भएका सम्बन्धित निर्वाचन क्षेत्रका सम्पूर्ण मतदाताले आफूलाई मन परेको उम्मेदवारलाई मतदान गरी आफ्नो मताधिकारको प्रयोग गर्न आह्वान गरेको छ । मतदाताले मतदान केन्द्रमा आफूलाई प्राप्त मतपत्र लिई गोप्य मतदान कक्षमा गएर मन परेको कुनै उम्मेदवारको चिह्न भएको कोठामा स्वस्तिक छापले मत सङ्केत गर्नुपर्छ ।

मतपत्र च्यातिएमा, मतदान अधिकृतको हस्ताक्षर नभएमा, दुई वटा निर्वाचन चिह्न रहेको कोठाको बीचमा पर्ने गरी मत सङ्केत गरेमा, स्वस्तिक छाप नबुझिने गरी लत्पतिएमा, निर्वाचन चिह्न रहेको कोठाभन्दा बाहिर मत सङ्केत गरेमा वा मतपत्रमा स्वस्तिक छाप बाहेक औँठा छाप, हस्ताक्षर आदिले मत सङ्केत गरेमा मत बदर हुने आयोगले जनाएको छ ।

गोरखा, शुक्रबार, १४ मङ्सिर २०८१ । गोरखा नगरपालिका गोरखाले यहीँ मङ्सिर १६ गते हुन लागेको स्थानीय तहको उपनिर्वाचनका लागि नगरपालिका भित्र सार्वजनिक विदा दिने निर्णय गरेको छ । नगरपालिकाले आज एक सूचनामार्फत उपनिर्वाचनका दिन नगरपालिका भित्र सार्वजनिक विदा दिने निर्णय भएको जनाएको हो ।

गोरखा नगरपालिका वडा नम्बर ५ मा रिक्त रहेको वडाध्यक्ष पदका लागि उपनिर्वाचन हुँदैछ । निर्वाचनको दिन उक्त वडामा सार्वजनिक विदा भएतापनि आसपासको वडाहरुमा समेत सो निर्वाचन कार्यक्रमबाट आवत जावतमा कठिनाई हुने र अन्यत्र कार्यरत रहेका वडा नम्बर ५ मा मतदान गर्न योग्य मतदाताहरुलाई समेत विदा वा वैकल्पिक व्यवस्था आवश्यक भएकोले नगरपालिकाले सार्वजनिक विदा दिने निर्णय गरेको नगरप्रमुख कृष्णबहादुर रानामगरले जानकारी दिनुभयो ।

नगरपालिकाले निर्वाचनलाई सफल पार्ने उद्देस्यसहित नगरप्रमुख स्तरीय निर्णयबाट विदाको घोषणा गरको हो । सार्वजनिक विदाका दिन नगरपालिका भित्रका रहेको नगरपालिका अन्र्तगतका सवै सरकारी कार्यालय, विद्यालय, स्वास्थ्य संस्था एवम् अन्य संघ संस्थाहरु बन्द रहने जनाइएको छ । गोरखा नगरपालिका वडा नम्बर ५ मा वडाध्यक्ष पदका लागि ९ जनाको उमेद्वारी रहेको छ ।

काठमाडौँ, सोमबार, १० मङ्सिर २०८१ । मङ्सिर १६ गते तय भएको स्थानीय तह उपनिर्वाचन हुने सम्बन्धित स्थानीय तह र वडामा सार्वजनिक बिदा दिन निर्वाचन आयोगले सिफारिस गरेको छ ।

निर्वाचन आयोगको आइतबार बसेको बैठकले उपनिर्वाचनलाई स्वच्छ, स्वतन्त्र, निष्पक्ष, विश्वसनीय र मितव्ययी रूपमा सम्पन्न गर्न, गराउन उपनिर्वाचन हुने स्थानीय तहमा मतदानस्थल उपयोग गर्ने, सार्वजनिक बिदा दिने र मतदाताका लागि मतदान गर्न सहज वातावरण बनाउने सम्बन्धमा आवश्यक निर्णय गरेको प्रवक्ता नीता पोखरेल अर्यालले जानकारी दिनुभयो ।

जसअनुसार मतदान हुने दिन स्थानीय तहको प्रमुख वा उपप्रमुख वा अध्यक्ष वा उपाध्यक्ष पदको लागि उपनिर्वाचन हुने स्थानीय तहमा सम्बन्धित स्थानीय तहभर र वडा अध्यक्षको उपनिर्वाचन हुने स्थानीय तहमा वडाको क्षेत्रभित्र सम्बन्धित स्थानीय तह अन्तर्गतका कार्यालयहरूमा सार्वजनिक बिदा दिने व्यवस्था मिलाउन संघीय मामिला तथा सामान्य प्रशासन मन्त्रालयलाई लेखी पठाउने निर्णय भएको उहाँले बताउनु भयो ।

साथै, मङ्सिर १४ देखि १६ गते मतदान सम्पन्‍न नभएसम्म मतदान स्थलको रूपमा कायम भएका सामुदायिक विद्यालय, निजी विद्यालय, वडा कार्यालय, स्वास्थ्य संस्था, सामुदायिक भवन, औद्योगिक प्रतिष्‍ठान वा अन्य सार्वजनिक स्थलहरू निर्वाचन प्रयोजनका लागि उपयोग गर्ने व्यवस्था मिलाउन नेपाल सरकार, संघीय मामिला तथा सामान्य प्रशासन मन्त्रालय मार्फत उपनिर्वाचन हुने सबै स्थानीय तहलाई निर्देशन दिने निर्णय पनि भएको उहाँले बताउनु भयो ।

गोरखा, आइतबार, २ मङ्सिर २०८१ । आगामी मङ्सिर १६ गतेका लागि गोरखा नगरपालिका वडा नम्वर ५ को वडा अध्यक्ष पदमा हुने उपनिर्वाचनका लागि दश जनाको उम्मेदवारी परेको छ । आइतवार मुख्य निर्वाचन अधिकृतको कार्यालय पुगेर उनीहरुले मनोनयन दर्ता गरेका हुन् ।

नेपाली कांग्रेसबाट भाइकाजी आले, नेकपा एमालेबाट दुर्गा माया थापा राना र नेकपा माओवादी केन्द्रबाट बिष्णुबहादुर मगरले उम्मेदवारी दर्ता गराएका छन् । एकीकृत समाजवादीबाट खङ्गबहादुर भुजेल, राष्ट्रिय स्वतन्त्र पार्टीबाट मंगलबहादुर थापा, राष्ट्रिय प्रजातन्त्र पार्टीबाट कल्पना राना, नेपाल समाजवादी पार्टीबाट रुपेश मग्राती र राष्ट्रिय प्रजातन्त्र पार्टी नेपालबाट रुप सिंह रानाको उम्मेदवारी परेको मुख्य निर्वाचन अधिकृत शिवबहादुर रानाभाटले बताए ।

त्यस्तै मंगोल नेशनल अर्गनाइजेसनबाट भवानी थापा मगर र नेशनल रिपब्लिक नेपालबाट सविना तामाङले मनोनयन दर्ता गरेको उनले जानकारी दिए ।

निर्वाचन आयोगले आइतवार बिहान दश बजेदेखि साँझ पाँच बजेसम्म मनोनयन दर्ताको समय तोकेको थियो । सोही अवधिमा उम्मेदवारहरुले चिल्ड्रेनपार्क स्थित वडा नम्वर ५ को कार्यालयमा स्थापना भएको मुख्य निर्वाचन अधिकृतको कार्यालय पुगेर मनोनयन दर्ता गराएका हुन् ।

मंसिर ४ गते उम्मेदवारको नामावली प्रकाशन गर्ने र मंसिर ५ गते दिउँसो एक बजेसम्म उम्मेदवारको नाम फिर्ता गर्न सकिने जिल्ला निर्वाचन अधिकृत टेकबहादुर कोइरालाले बताए ।