Category: मनोरञ्जन

काठमाडौँ, शनिबार, २७ वैशाख २०८२ । काठमाडौँमा ‘राष्ट्रिय दोहोरी गीत आइडल-२०८२’ हुने भएको छ । राजधानीमा पत्रकार सम्मेलनको आयोजना गरी आगामी जेष्ठ २६, २७ र २८ मा राष्ट्रिय नाचघर जमलमा दोहोरी गीत आइडल हुने जानकारी गराइएको हो ।

सांस्कृतिक समाज नेपालले प्रतियोगिताको तयारी सुरु गरिएको जानकारी गराइएको छ ।

आयोजना हुने यस दोहोरी आइडल दोहोरी गीत प्रतियोगिता प्रिमियर लिगको पहिलो चरणको कार्यक्रम समेत भएको कार्यक्रमका संयोजक चन्द्र शर्माले जानकारी दिनुभयो । शर्माले कार्यक्रमका बारेमा जानकारी दिँदै दोहोरी प्रतियोगितामा सहभागी हुनेले एक दोहोरी साँझबाट एक-एक जना मात्रै गायक गायिकाले सहभागी हुन पाउने बताउनु भयो ।

राष्ट्रिय दोहोरी गीत आइडल विजेताले ३३ हजार ३३३ नगद र मोटरसाइकल प्राप्त गर्नेछन् भने दोस्रो हुनेले २२ हजार २२२ नगद सहित स्कुटर प्राप्त गर्ने आयोजकले जनाएको छ ।

कार्यक्रमका सभापति सांस्कृतिक समाज नेपालका अध्यक्ष रामप्रसाद अवस्थीले सांस्कृतिक समाज नेपालले यसअघि पनि दोहोरी क्षेत्र विशेष धेरै कार्यक्रम गरेको र यस्ता कार्यक्रमहरूलाई निरन्तरता दिने जानकारी दिनुभयो ।

कार्यक्रममा राष्ट्रिय लोक तथा दोहोरी गीत प्रतिष्ठान नेपालका उपाध्यक्ष कृष्ण रेउले, वरिष्ठ पत्रकार डब्बु क्षेत्री लगायतको उपस्थित थियो ।

राष्ट्रिय लोक दोहोरी गीत आइडल २०८२ को मिडिया पार्टनरको रूपमा राष्ट्रिय लोक सञ्चारकर्मी नेपाल रहेको छ ।

काठमाडौँ, बिहीबार, ७ चैत्र २०८१ । आज (बिहीबार)देखि नेपाल अन्तर्राष्ट्रिय चलचित्र महोत्सव (निफ) हुन गइरहेको छ । सोमबारसम्म काठमाडौंमा हुने आठौं संस्करणको निफमा ४० देशका ८७ चलचित्र प्रदर्शन हुने आयोजक नेपाल चलचित्र तथा सांस्कृतिक प्रतिष्ठानले जनाएको छ ।

आज दिउँसो डेढ बजे क्युएफएक्स सिभिल मलमा राष्ट्रियसभाका अध्यक्ष नारायणप्रसाद दाहालको प्रमुख आतिथ्यमा उद्घाटन हुने महोत्सवको पहिलो दिन मीनबहादुर भाम निर्देशित चलचित्र ‘शाम्बाला’ प्रदर्शन हुनेछ । अन्तिम दिन अर्थात् चैत ११ गते सोमबार सञ्चार तथा सूचना प्रविधिमन्त्री पृथ्वीसुब्बा गुरुङबाट समापन हुनेछ ।

‘विश्वभरिका कथाहरूको उत्सव नेपाल अन्तर्राष्ट्रिय चलचित्र महोत्सव’ भन्ने नारा रहेको महोत्सवमा ४० देशका ८७ वटा चलचित्र छानिएको छ,’ आयोजकले जारी गरेको विज्ञप्तिमा भनिएको छ, ‘महोत्सवमा देखाइने चलचित्रहरू बुसान, कान्स, लोकार्नो, बर्लिन आदि प्रतिष्ठित फेस्टिभलमा पनि प्रदर्शन भइसकेका छन् ।’ प्रविधिमा आएको विकासलाई आत्मसात् गर्दै र दर्शकलाई नयाँ स्वाद दिन यो संस्करणदेखि एआईबाट बनाइएको वा सोसम्बन्धी विषयमा बनेका चलचित्रको प्रतिस्पर्धा पनि हुने उल्लेख छ ।

महोत्सवमा अन्तर्राष्ट्रिय प्रतिस्पर्धाअन्तर्गत सर्वोत्कृष्ट फिचर फिल्मलाई १५ सय अमेरिकी डलरसहित गौतम बुद्ध अवार्ड प्रदान गरिनेछ । सर्वोत्कृष्ट अन्तर्राष्ट्रिय वृत्तचित्रलाई एक हजार डलर राशिको माउण्ट एभरेष्ट अवार्ड र सर्वोत्कृष्ट अन्तर्राष्ट्रिय लघु चलचित्रलाई पाँच सय डलरको बागमती अवार्ड प्रदान गरिने जनाइएको छ ।

एआई चलचित्रलाई पाँच सय डलर राशिको मञ्जुश्री अवार्ड प्रदान गरिनेछ । नेपाली प्रतिस्पर्धाअन्तर्गत उत्कृष्ट फिचर फिल्मलाई एक लाख नगद र ट्रफी, उत्कृष्ट सर्ट फिल्म र उत्कृष्ट वृत्तचित्रलाई ५०/५० हजार नगद र ट्रफी प्रदान गरिनेछ ।

महोत्सवमा सहभागी हुन ५० बढी अन्तर्राष्ट्रिय चलचित्रकर्मीहरू नेपाल आएकोे आयोजक संस्थाका अध्यक्ष केपी पाठकद्वारा जारी विज्ञप्तिमार्फत् जनाइएको छ ।

यसपटक निफको निर्णायक मण्डलमा छोटा चलचित्र तथा वृत्तचित्रतर्फ प्रमुख जुरीमा निर्देशक दीपेन्द्र गौचन र चलचित्रतर्फ अभिनेत्री सुरक्षा पन्त, निर्देशक सम्पादक रक्षा सिंह राणा, चलचित्र समीक्षक सम्पादक रीता दत्ता, निर्देशक लिउ जियान र कलाकार जमल शाहलगायत रहनुभएको छ ।

महोत्सवमा कुनै एउटा देशको चलचित्रलाई विशेष प्रदर्शन गर्ने योजनाअनुसार यस वर्ष महोत्सवको तेस्रो दिन शनिबार ‘रसियन फिल्म डे’ को पनि आयोजना गरिने नेपाल चलचित्र तथा सांस्कृतिक प्रतिष्ठानले जनाएको छ ।

महोत्सवअन्तर्गत नै शनिबार आयोजना हुने उक्त फिल्म डेमा रसियाका तीनवटा चलचित्र प्रदर्शन गरिनेछ । यसपटक महोत्सवमा तीनवटा अडियन्स च्वाइस अवार्ड र एआई अवार्ड थप पनि गरिएको छ । अडियन्स च्वाइस अवार्डका लागि चैत ७ गतेदेखि ११ गते दिनको ४ बजेसम्म खल्ती एपबाट भोटिङ गर्न सकिने व्यवस्था गरिएको आयोजकले एक विज्ञप्तिमार्फत् जानकारी दिएको छ ।

काठमाडौँ, आइतबार, २७ माघ २०८१ । लक्जरी इभेन्ट्स एण्ड ईन्टरटेन्मेन्ट प्रा लि को आयोजनामा ‘ममी’ को च्यारिटी शो सम्पन्न भएको छ । शनिबार रानीपोखरीमा अवस्थित बिश्वज्योति सिनेकम्प्लेक्समा ‘ममी’ को च्यारिटी शो सम्पन्न गरिएको हो ।

Innerwheel Club of Satdobato को सहयोगार्थ गरिएको उक्त शो मा १६० जना दर्शकहरूको उपस्थिति रहेको लक्जरी इभेन्ट्स एण्ड ईन्टरटेन्मेन्टका अध्यक्ष पुजा रेग्मीले बताउनु भयो । ‘ममी’ को च्यारिटी शो मा ललितपुर महानगरपालिका वडा नं १५ का वडा सचिव निरन श्रेष्ठ, फिल्मका निर्देशक समर निरौला, निर्माता पूर्णिमा जोशी, कलाकारहरु समीप निरौला, सुलक्षण भारती, बाल कलाकार जेभिस श्रेष्ठ, जेनीश श्रेष्ठ लगायत अन्य अतिथि महानुभावको उपस्थिति रहेको थियो ।

कार्यक्रम समारोह सञ्चालन सावित्री ढुंगानाले गर्नु भएको थियो भने Innerwheel Club of Satdobato की चार्टर्ड प्रेसिडेन्ट सिमा राईले स्वागत मन्तव्य दिनु भएको थियो ।

समर निरौला निर्देशित फिल्म ‘ममी’ मा प्रियंका कार्की, दीया मास्के, सुलक्षण भारती, आयुषी ढकाल लगायतको अभिनय छ । घरपालुवा कुकुर मारेपछि कालो बिरालोलाई घरमा ल्याइँदा सो घरमा हुने रहस्यपूर्ण घटनाको कथावस्तुमा फिल्म बनेको छ ।

सो ट्वान्टी फाइभको प्रस्तुतिमा निर्माण भएको ‘ममी’ फिल्ममा समर निरौला र पूर्णिमा जोशीको लेखन रहेको छ । समर डेब्यू निर्देशक हुन् । फिल्मको निर्माता लोक राज जोशी तथा पूर्णिमा जोशी हुन् भने कार्यकारी निर्मातामा सुमन कोइराला रहेका छन् ।

फिल्मको छायांकन निशाल पौडेल र शरद महतोले संयूक्त रुपमा गरेका हुन् भने सम्पादन सुरेन महर्जनको रहेको छ । यसैगरी पाश्र्व ध्वनीमा रोहित शाक्य, साउन्ड डिजाईनमा श्रवल आरपि, सम्पादनमा सुरेन्द्र महर्जन, एनवी महर्जनको द्वन्द्व निर्देशन, रंग संमयोजनमा दिपेश चौधरी तथा संगीतकारमा एसडी योगी रहेका छन् ।

फिल्मलाई काठमाडौं उपत्यकामा काफिया फिल्म्स र मोफसलमा कुवेर सिने डिष्ट्रीव्युसनले वितरण गरेको हो ।

फिल्म ‘ममी’ आज शुक्रबारदेखि प्रदर्शनमा आएको छ ।

ललितपुर, शुक्रबार, २५ माघ २०८१ । लक्जरी इभेन्ट्स एण्ड ईन्टरटेन्मेन्ट प्रा लि को आयोजनामा ‘ममी’ को च्यारिटी शो हुने भएको छ । माघ २६ गते शनिबारका दिन दिउसो २ बजे रानीपोखरीमा अवस्थित बिश्वज्योति सिनेकम्प्लेक्समा ‘ममी’ को च्यारिटी शो हुने लक्जरी इभेन्ट्स एण्ड ईन्टरटेन्मेन्टका अध्यक्ष पुजा रेग्मीले बताउनु भयो ।

समर निरौला निर्देशित फिल्म ‘ममी’ मा प्रियंका कार्की, दीया मास्के, सुलक्षण भारती, आयुषी ढकाल लगायतको अभिनय छ । घरपालुवा कुकुर मारेपछि कालो बिरालोलाई घरमा ल्याइँदा सो घरमा हुने रहस्यपूर्ण घटनाको कथावस्तुमा फिल्म बनेको छ ।

सो ट्वान्टी फाइभको प्रस्तुतिमा निर्माण भएको ‘ममी’ फिल्ममा समर निरौला र पूर्णिमा जोशीको लेखन रहेको छ । समर डेब्यू निर्देशक हुन् । फिल्मको निर्माता लोक राज जोशी तथा पूर्णिमा जोशी हुन् भने कार्यकारी निर्मातामा सुमन कोइराला रहेका छन् ।

फिल्मको छायांकन निशाल पौडेल र शरद महतोले संयूक्त रुपमा गरेका हुन् भने सम्पादन सुरेन महर्जनको रहेको छ । यसैगरी पाश्र्व ध्वनीमा रोहित शाक्य, साउन्ड डिजाईनमा श्रवल आरपि, सम्पादनमा सुरेन्द्र महर्जन, एनवी महर्जनको द्वन्द्व निर्देशन, रंग संमयोजनमा दिपेश चौधरी तथा संगीतकारमा एसडी योगी रहेका छन् ।

फिल्मलाई काठमाडौं उपत्यकामा काफिया फिल्म्स र मोफसलमा कुवेर सिने डिष्ट्रीव्युसनले वितरण गरेको हो ।

फिल्म ‘ममी’ आज शुक्रबारदेखि प्रदर्शनमा आएको छ ।

काठमाडौँ, बिहिबार, २४ माघ २०८१ । सातौ संस्करणको ‘मिसेस ब्युटी क्विन नेपाल’को उपाधि वर्षा कुवरले चुम्नुभएको छ । सिजन मिडियाले आयोजना गरेको प्रतियोगितामा १३ जना प्रतियोगी सहभागीलाई पछि पार्दै कुँवरले ताज पहिरिनुभएको हो । उहाँले मिसेज पपुलर तथा सम्बन्ध मिसेस पर्सनालीटीको उपाधिसमेत प्राप्त गर्नुभएको थियो । वर्षाले ताजसँगै रेफ्रिजेनेटर, लेटमिइनको तर्फबाट ५० हजार बराबरको गिफ्ट भौचर र डम डाइनामिकबाट २० हजारको गिफ्ट भौचर साथै अन्य उपहारहरू प्राप्त गर्नुभयो ।

प्रतियोगितामा करुणा विक फष्ट रनरअप हुनुभयो । उहाँले मष्ट ट्यालेन्टको टाइटल अवार्ड पनि हात पार्न सफल हुनुभयो । करुणाले ३२ इन्चको टिभी, लेटमिइनको तर्फबाट ३० हजारको गिफ्ट भौचर पनि प्राप्त गर्नुभयो ।

यसैगरी प्रतियोगितामा सेकेन्ड रनरअप रिन्जु कुसवहा हुनुभयो । उहाँले फोटोजेनीकको पनि उपाधि जित्न सफल हुनुभयो । थर्ड रनरअप सिवानी मित्र र चौथो रनरअप उर्मीला कनौजिया मगीया हुनुभयो । अर्गनाइजर च्वाइसको उपाधि भने अञ्जु क्षेत्रीले जित्नुभएको थियो ।
प्रतियोगिताका अन्य विधामा अनिता देवी साहले फेन्ड्ली, सविता पन्त इनोसेन्ट, कान्छी माया खयमली क्रिएटीभ, अम्विका गजमेर भ्युओरस च्वाइस, भावना ऐडी व्युटीफुल स्माइल, रुकमती भण्डारी लिडरसिप, अरुना घिमिरे मिसेज इनरजेटिक र हीरादेवी श्रेष्ठले व्युटीफुलको उपाधि जित्नुभएको थियो ।

कार्यक्रमका प्रमुख अतिथि उपसभामुख इन्दिरा रानाले यस्ता प्रतियोगिताले विवाहित महिलाहरूको सौन्दर्य साथै आन्तरिक क्षमता, आत्मविश्वास साथै महिलाहरूको नेतृत्वमा थप बल पुग्ने विश्वास व्यक्त गर्नुभयो ।

प्रतियोगिताको निर्णायक मण्डलमा मुख्य निर्णायकको भूमिकामा वर्ड डिलर्स भारतकी प्रबन्ध निर्देशक डा. विनिता राज, जुम्बा प्रशिक्षक तथा मोडल सोनाम केसी, नेपाल एयरहोस्टेस एकेडेमीका प्रशिक्षक ईश्वरा पछाई, एसोसिएट कन्सल्टेन्ट एमडी, साइकियाट्री डा.ऋचा अमात्य, व्यवसायी सुनिता अधिकार, कान्तिपुर टिभीकी उपसम्पादक तथा टिभी प्रस्तोता रुबिना थापा, गायिका मोडल तथा सामाजिक अभियन्ता रेखा शाह रहेको सिजन मिडियाका कार्यक्रम निर्देशक रेजिना तुलाधरले जानकारी दिनुभयो ।

गोरखा, बुधबार, २३ माघ २०८१ । तुलसी घिमिरेको निर्देशन रहेको चलचित्र ‘पहाड’ को शुभमुहूर्त गर्दै छायांकन सुरु गरिएको छ । मंगलबार बिहान गोरखा दरबारमा पूजा गरेपछि अभिनेता मदनकृष्ण श्रेष्ठ, अरुण क्षेत्री र डेब्यु अभिनेत्री पञ्चमी घिमिरेले मूहुर्त सट दिनुभएको थियो । चलचित्रका सुटिङ गोरखा र आसपासमा २५ दिन चल्नेछ । त्यस्तै चलचित्रको छायांकन १५ दिन भने भारतका विभिन्न क्षेत्रमा हुने जनाइएको छ ।

युवा जनशक्ति विदेश पलायन हुँदा खाली भएका पहाड र यसले ल्याउने सामाजिक तथा आर्थिक समस्याको कथावस्तु रहेको चलचित्रको लेखन निर्देशक घिमिरेकै हो । अहिलेको समाजको तीतो यथार्थलाई चलचित्रमार्फत दर्शकसमक्ष पु¥याउन खोजिएको घिमिरेले बताउनुभयो ।

ओजस्वी केसी निर्माता रहेको चलचित्रलाई प्रमोद प्रधानले छायांकन गरिरहनुभएको छ । भारतमा चलचित्र, वेब सिरिज र टेलीफिल्मसमेत छायांकन गरिसक्नुभएका छायांकार प्रधानले निर्देशक घिमिरेसँग अन्याय, कोसेली, चिनो र दक्षिणामा पनि सहकार्य गर्नुभएको थियो ।
भाग्यरत्न फिल्मस् प्रालिको व्यानरमा निर्माण भइरहेको यो चलचित्रमा विपीन कार्की, सुनिल थापालगायतका कलाकारको अभिनय छ । यसमा रञ्जित गजमेर संगीत निर्देशक, भारती घिमिरे क्रिएटिभ निर्देशक रहनेछ ।

रिम्पोछे लामा थिंग र सुरेश लामा थिंग सहनिर्माता रहेको चलचित्र नेपालमा बैंकटेस इन्टरटेनमेन्ट र डायस्पोरामा सेभेन सिज इन्टरनेशनल फिल्म्सले वितरण गर्नेछ । पछिल्लो फिल्म ‘दर्पणछायाँ-२’ पछि केही समय विश्राम लिनुभएका निर्देशक घिमिरेले ‘पहाड’मार्फत फेरि दर्शकमाझ आउँदै हुनुहुन्छ ।

युवराज सफलको प्रस्तुति रहेको “म त जिउदै मरेकी छु” गीतको भिडियो सार्बजनिक

काठमाडौँ, बुधबार, २ माघ २०८१ । युवराज सफलको प्रस्तुति रहेको “म त जिउदै मरेकी छु” गीतको म्युजिक भिडियो सार्बजनिक भएको छ ।

म त जिउँदै मरेकी छु नामक वियोगान्त गीतमा निरा रानाभाटको सुमधुर आवाज रहेको छ । संगीत कृष्ण भारद्वाजको रहेको छ भने अभिनय मोडल एवम् नायिका नम्रता सापकोटा, अनुप जङ्ग थापा, सजिना लामिछाने र युवराज सफलले गरेका छन् ।

मोडल एवम् नायिका नम्रता सापकोटा, अनुप जङ्ग थापा, सजिना लामिछाने, र स्वयं युवराज सफलले अभिनय गरेका छन् ।

गीतको म्युजिक भिडियोको निर्देशन राहुल बराइलीले गरेका छन् ।

गोरखा, मंगलबार, ११ मङ्सिर २०८१ । गुरुङ समुदायको घँटु परम्परामाथिको फिल्म ‘जुन-किरी’ को दोस्रो चरणको छायांकन सुरू भएको छ।

हाल गोरखाको सिरानचोकस्थित श्रीनाथ मण्डलीमा फिल्मको दोस्रो चरणको छायांकन भइरहेको छ । गत असोज १५ गतेबाट फ्लोरमा गएको टिमले दसैंअघि पहिलो चरणको काम सकाएको थियो । फिल्मको दोस्रो चरणको काम १५ गतेसम्म सकिने फिल्मका लेखक तथा अभिनेता सुरज तमुले जानकारी दिए ।

दीप गुरुङको निर्देशन रहेको फिल्ममा सुरजको र भरत राईको कथा र केर कोइँच लिनुचको पटकथा छ ।

फिल्ममा सुरजसँगै अभिनेत्री लक्ष्मी गुरुङ मुख्य भूमिकामा छन्। सुरजले ‘ऊनको स्वीटर’, ‘गोरखा वारियर’, ‘एन्जिला’, ‘सारंगा’, ‘नैना’ लगायतका फिल्ममा अभिनय गरिसकेका छन् ।

एक दशकदेखि रंगकर्ममा सक्रिय सुरजले ‘स्कुल’, ‘चालिसे भीर’ लगायतका नाटक निर्देशन गरिसकेका छन् । उनले ‘दयामाया आफूमात्र लिखापानी आइपुगी’, ‘हरियो ढुंगा’, ‘मिमांशा’, ‘योगमाया’, ‘कोरा’, ‘अर्को अर्थ नलागेमा’, ‘ब्युँझिएको सिरानी’, ‘चोरको स्वर’ लगायत करिब २ दर्जन नाटकमा अभिनय गरिसकेका छन् ।

लक्ष्मीको यो दोस्रो फिल्म हो। यसअघि ‘नैना’ फिल्ममा उनले मुख्य भूमिकामा काम गरेकी थिइन् । ‘माइली’, ‘युके लन्डन’ लगायत दर्जनौं म्युजिक भिडिओमा उनले काम गरिसकेकी छन् ।

फिल्म सुरज र लक्ष्मीसँगै कलाकार डिबी गुरुङ, अनिल सुब्बा, कविता आलेको पनि महत्वपूर्ण भूमिका छ । त्यसैगरी फिल्ममा प्रतीना राई, प्रविन मगर, सुस्मिता गुरुङ, माया गुरुङ, सौजन सेन्ह्याङ र समर्पण श्रीलगायका कलाकारको अभिनय छ ।

निर्देशक दीप गुरुङको यो दोस्रो फिल्म हो । उनले यसअघि फिल्म ‘नैना’ निर्देशन गरेका थिए। उनले दर्जनौं म्युजिक भिडिओ निर्देशन गरिसकेका छन् ।

फिल्ममा काठमाडौंमा संघर्ष गरिरहेको फोटोग्राफरको यात्रा र अनुभूतिको कथामा केन्द्रित छ। गुरुङहरूमाथि पहिल्यैदेखि नाच्दै आएको घाटुको फोटो खिच्न जाँदा घट्ने घटना र भेटिने सम्बन्धहरूले कथालाई रोचक बनाउने विश्वास निर्माण टिमले लिएको छ ।

फिल्मलाई सिनेमाटोग्राफर योगेश दाहालले खिचिरहेका छन् ।

काठमाडौँ, बिहिबार, ६ मङ्सिर २०८१ । शंकर लामिछानेको शब्द र संगीतमा राजेशपायल राईले गाएको ‘चिलिममा गाँजा भरेको’ गीत सार्वजनिक भएको छ ।

मंगलवार ओएसआर डिजिटलबाट गीत सार्वजनिक गरिएको हो । लामिछानकै शब्द र संगीतमा रहेको गीतको एरेन्ज बाबुल गिरीले गरेका हुन् । यस म्यूजिक भिडियोलाई विकास प्रसाईले निर्देशन गरेका छन् । गीतको भिडियोमा मिस पविको रुपमा चर्चा कमाइरहेकी पवित्रा साकी , शंकर लामिछाने , लगायतका कलाकारको अभिनय रहेको छ ।

गीतको अन्त्यतिर भिडियोमा समावेश गरिएको संवाद सहितको दृश्यले धेरैको ध्यान तान्ने देखिएको छ । देशप्रेम र इमान्दारितालाई लामिछानेले बलियो रुपमा प्रस्तुत गरेका छन् । सो संवादमा चर्चित कानुन व्यवसायी स्वागत नेपाललाई समेत अतिथी कलाकारका रुपमा देख्न सकिन्छ ।

लामो समयदेखि अष्ट्रेलियामा बस्दै आएका लामिछानेको यसअघि दर्जनौं गीत बजारमा आएका छन् । छमछम , झुक्कायो ऐनाले जस्ता गीत लोकप्रिय भएका छन् । मेलिना राईको आवाजमा रहेको सबकुरा नक्कली बनायो चाईनाले मै राम्री हो कि झुक्कायो ऐनाले बोलको गीत बहुचर्चित भएको थियो ।

लामिछानेले नेपाली कथानक चलचित्र किन लाग्छ मायाँ को मुख्य भूमिकामा अभिनय गरेका छन् । लामिछानेले उपन्यासकार बालकृष्ण समको उपन्यास ‘बोक्सी’ मा आधारित चलचित्र ‘बोक्सी’ लगायत अन्य केही नाटकमा समेत काम गरेका छन् ।

गोरखा, बुधबार, ५ मङ्सिर २०८१ । चलचित्र ‘रिमै’ को छायांकन सुरु भएको छ । मंगलबार गोरखाको सिरानचोकमा शुभमुहूर्त गर्दै छायांकन सुरु गरिएको निर्देशक खिलबहादुर गुरुङले जानकारी दिए ।

चलचित्रको मुहूर्त सर्ट अभिनेता दयाहाङ राई र अभिनेत्री रिस्मा गुरुङले दिएका छन् । चलचित्र अब एक महिना गोरखाको सिरानचोक, झार गाउँ, कुल गाउँ, भंगेरी, लासे, सिम्ले, गोहरे, चित्रेपोखरी र गोर्खा बजारमा छायांकन हुनेछ ।

रोहित कट्टेल प्रस्तुतकर्ता रहेको सिनेमाका कार्यकारी निर्माता रत्न श्रेष्ठ हुन् ।

चलचित्रमा दयाहाङ र रिस्मासँगै बुद्धि तामाङ, गौमाया गुरुङ, कविता आले मगर, माओत्से गुरुङ, पुस्कर गुरुङ, वीरवल घले, डिवी गुरुङलगायत कलाकारको अभिनय रहनेछ ।

वीरवल घले, टिका गुरुङ र दुन बहादुर घले निर्माता रहेको चलचित्रमा बिनु गुरुङ, रोशन भट्टराई, राजेश घिमिरे सह–निर्माताको रुपमा रहेका छन् ।

उपेन्द्र सुब्बाको लेखन रहेको सिनेमालाई शैलेन्द्र ध्वज कार्कीले छायांकन गर्नेछन् ।