गोरखाको धार्चे गाउँपालिकाले महिलाहरुलाई डकर्मी तालिम

गोरखा, बुधबार, ७ जेठ २०८२ । गोरखाको धार्चे गाउँपालिकाले महिलाहरुलाई डकर्मी तालिम संचालन गरेको छ । महिलाहरुको क्षमता विकास गर्ने र आयआर्जन गरी आत्मनिर्भर गराउने उद्देश्यले एकहप्ते आधारभूत डकर्मी तालिम दिएको पालिकाले जनाएको छ ।

तालिममा पालिकाभित्रको सातै वटा वडाबाट ४२ जना महिलाहरुको सहभागिता रहेको पालिकाका प्रमुख प्रशासकीय अधिकृत काजीमान सुनारले बताए । उनका अनुसार तालिम महिलाका लागि लक्षित गरेर संचालन गरिएकाले महिलाहरुको सहभागितालाई प्राथमिकता दिइएको छ । महिलाहरुलाई गारो तथा पर्खाल लगाउने, प्लास्टर गर्ने, काठ चिर्ने लगायत डकमीं सीपहरु सिकाइएको उनले बताएका छन् ।

‘तालिममा पुरुषभन्दा महिला धेरै हुनुहुन्छ । सहभागी छनोट गर्ने क्रममा पनि हामीले महिलाहरुलाई प्राथमिकतामा राखेका थियौँ’, उनले भने, ‘पालिकाका अधिकांश पुरुषहरु वैदेशिक रोजगारीमा छन् । यहाँ संचालन हुने विकास निर्माणका योजनाहरुमा बाहिरबाट कामदार मगाउनुपर्ने बाध्यता छ । यो तालिम दिइसकेपछि यहाँका विकासे योजनाहरुमा स्थानीयहरुको केही हदसम्म भएपनि सहभागिता बढ्ने पालिकाको अपेक्षा हो ।’

अहिले पुरुषहरु प्राय वैदेशिक रोजगारीमा जाने, गाउँमा प्राय महिलाहरु धेरै हुने भएकाले पनि महिलाहरुलाई आत्मनिर्भर गराउन र कामका लागि आवश्यक जनशक्ति तयार गर्न सो तालिम आवश्यक रहेको बताइएको छ ।

डकर्मीको काम महिलाहरुले पनि सजिलै गर्न सक्ने भएकाले तालिमका लागि पालिकाले महिलाहरुलाई बढी जोड दिएको सुनारले जानकारी दिए । उनी भन्छन, ‘सामान्य पर्खाल लगाउने, प्लास्टर गर्ने काम महिलाहरुले पनि सजिलै गर्न सक्छन् । फेरि धार्चेको सन्दर्भमा गाउँघरमा प्राय महिलाहरु मात्र हुनुहुन्छ । यहाँ संचालन भएका ठुला साना योजनाहरुमा महिलाहरुको सहभागिता बढाएर उहाँहरुको जीविकोपार्जन बढाउने पनि हाम्रो उद्देश्य छ ।’

यही जेठ १ गते बिहिबारबाट सुरु भएको तालिम बुधबारसम्म संचालन हुनेछ । पालिकाले रु १६ लाख रुपैँया बिनियोजन गरेर डकर्मी सीप विकास तालिम संचालन गरेको बताइएको छ ।