Author: ipmsamachar

गोरखा, बुधबार, २८ फागुन २०८१ । गोरखाको भिमसेन थापा गाउँपालिकाका नगर प्रहरी विपदमा पनि सक्रिय हुने भएका छन । संविधानको अनुसूची ८ र ९ अनुसार स्थानीय सरकारका काम, कर्तव्य र अधिकार २२ प्रकारका छन् ।

यीमध्ये सबैभन्दा पहिलो नगर प्रहरी राख्ने अधिकार छ । स्थानीय सरकारको अभ्यास सुरु भएको ८ वर्ष बित्दा गोरखाकोे भिमसेन थापा गाउँपालिकाले पहिलाे पटक नगर प्रहरीमार्फत सुरक्षामात्र नभइ विपतमा पनि नागरिकको जीउधन बचाउन काम थालेको छ ।

गाउँपालिकाले नियुक्त गरेको नगर प्रहरी टोलटोलमा सामाजिक सुरक्षा भत्ता वितरण र नियमित बजार अनुगमनलगायतका काममा पनि खट्दा स्थानीयबासीले सजिलो महसुस गरेका छन् ।

भीमसेन थापा गाउँपालिकाले १ वर्ष अघि आफ्नै आन्तरिक स्रोत परिचालन गरेर पालिका भित्रको सुरक्षाको जिम्मा नगरप्रहरीलाई दिएको छ ।

प्रहरीको सक्रियतासँगै अवैध नदीजन्य पदार्थको उत्खनन्को रोकथाम र राजश्व बढाउन पनि सजिलो भएको गाउँपालिकाका प्रमुख प्रशासकिय अधिकृत चित्रबहादुर अधिकारीले बताए ।

पालिकामा सेवा लिन आउने नागरिकका लागि हेल्प डेक्समार्फत समन्वय गर्ने कम पनि नगर प्रहरीमार्फत भएको उनले जानकारी दिए । गाउँपालिकाले नगरप्रहरीको भर्ना छनौटसँगै करिब ३ महिना आधारभूत सुरक्षा तालिम दिएर परिचालन गरेको हो ।

गोरखा, बुधबार, २८ फागुन २०८१ । गोरखाको धार्चे गाउँपालिकामा सम्पन्न राष्ट्रिय पुरुष युगल (एक्सेप्ट टप २०) विधा अन्तरगतको ब्याटमिण्टन प्रतियोगिताको उपाधि विधान अधिकारी र पविन लिङथेपको जोडीले हात पारेको छ । गाउँपालिकाको स्थापना दिवसको अवसरमा आयोजित ‘पहिलो अध्यक्ष कप खुल्ला राष्ट्रिय ब्याडमिन्टन प्रतियोगिता’ को उपाधि त्रिभुवन आर्मी क्लवका अधिकारी र लिङथेपको जोडीले जितेको हो ।

विजेता द्वयले रु ७५ हजार नगद पुरस्कारसहित मेडल र प्रमाणपत्र प्राप्त गरेको पालिकाले जनाएको छ । यस्तै, सुप्रिम पन्त र सुविन श्रेष्ठको जोडी दोस्रो भएका छन् । भने विवेक चौधरी, हिमान्सु कँवर मगर र राम मल्ल ठकुरी, सुजन थापाको जोडी प्रतियोगितामा तेस्रो भएका छन् । उनीहरुले क्रमश रु ३० हजार र २०÷२० हजार नगद पुरस्कार सहित मेडल र प्रमाणपत्र प्राप्त गरेका छन् ।

खुल्ला जिल्ला स्तरीय पुरुष युगल व्याटमिण्टन प्रतियोगितामा धादिङका भिषण श्रेष्ठ र राजकुमार श्रेष्ठको जोडी पहिलो भएका छन् । प्रतियोगितामा धादिङकै जेनिश अमात्य र वुद्धि थापाको जोडी दोस्रो भएका छन् । यस्तै, गोरखाको मुकुल गुरुङ र छत्र थापाको जोडी र धादिङको विष्णुलाल श्रेष्ठ र कृष्ण कुमार श्रेष्ठको जोडी तेस्रो भएका छन् । पहिलो, दोस्रो र तेस्रो हुनेहरुले क्रमश रु ४५ हजार, ३० हजार र १५\१५ हजार नगद पुरस्कार सहित ट्रफी, मेडल र प्रमाणपत्र प्राप्त गरेको पालिकाका कर्मचारी सन्देश गौडेलले बताए ।

अन्तरपालिका स्तरीय युगल विधामा बारपाक सुलिकोट गाउँपालिकाका कृष्ण गुरुङ र रमेश थापाको जोडी प्रथम भएको उनले जानकारी दिए । यसैगरी, जिल्ला प्रहरी कार्यालयका लिला बहादुर रानाभाट र विर कुमार थापाको जोडी प्रतियोगितामा दोस्रो बनेको राज गुरुङले जानकारी दिए । सहिदलखन गाउँपालिका र गोरखा नगरपालिकाले भने तृतीय स्थान हासिल गरेका छन् । सहिदलखनका डिल थापा, निर्मल थापा र गोरखा नगरपालिकाका सुजन भट्ट र अन्जित श्रेष्ठको जोडीले तेस्रो स्थान हात पारेको हो ।

अन्तरपालिका स्तरीय युगलका बिजेताहरुले क्रमश रु ३० हजार, २० हजार र १०÷१० हजारसहित मेडल र प्रमाणपत्र प्राप्त गरेका छन् । ‘स्वास्थ्यका लागि खेलकुद, राष्ट्रका लागि खेलकुद’ भन्ने मुल नाराका साथ गत आइतबारबाट सुरु भएको प्रतियोगिता मंगलबार सम्पन्न भएको हो । प्रतियोगिता अन्तरगत राष्ट्रिय पुरुष युगल, खुल्ला जिल्ला स्तरीय पुरुष युगल र गोरखा जिल्ला अन्तर पालिका स्तरीय युगल गरी तीन विधामा प्रतिस्पर्धा भएको थियो ।

साथै, स्थापना दिवसको अवसरमा आयोजित समारोहमा विभिन्न क्षेत्रमा उत्कृष्ट कार्य सम्पादन गर्नेहरुलाई पुरस्कृत गरिएको छ । उत्कृष्ट कर्मचारीका रुपमा पालिकाका जिन्सी शाखामा कार्यरत विजयकुमार श्रेष्ठ, उत्कृष्ट विद्यालयका रुपमा जनजागृति मावि माछीखोलालाई सम्मान गरिएको छ । त्यस्तै उत्कृष्ट शिक्षकका रुपमा प्रभातकिरण मावि लापुवेशीकी शिक्षिका संसरी गुरुङ, उत्कृष्ट स्वास्थ्यकर्मीका रुपमा केरौँजा स्वास्थ्य चौकीकी सरिस्मा घलाङ तामाङलाई सम्मान गरिएको छ ।

काठमाडौँ, मंगलबार, २७ फागुन २०८१ । नबिल बैंकले नबिल स्कुल अफ सोसल इन्टरप्रेनरसिप (नबिल एसएसई) फेलोसिप कार्यक्रमको पाँचौं समूहका लागि आवेदन माग गरेको छ । सामाजिक उद्यमशीलतालाई प्रोत्साहन गर्ने उद्देश्यले सुरु गरिएको यो कार्यक्रममा उद्यमशीलतामार्फत समाजमा सकारात्मक प्रभाव पार्न चाहने व्यक्तिहरूले सहभागिता जनाउन सक्नेछन्। इच्छुक आवेदकले आगामी चैत २५ गतेसम्म आवेदन पेस गर्न सक्नेछन् ।

यो फेलोसिप कार्यक्रम त्रिभुवन विश्वविद्यालयको व्यवस्थापन संकायअन्तर्गत स्कुल अफ म्यानेजमेन्टसँगको सहकार्यमा सञ्चालित छ र ६ महिनाको अवधिसम्म चल्नेछ। यसमा १८ दिनको निःशुल्क आवासीय तालिम र एक वर्षको परामर्श सेवा समावेश छ । हालसम्म तीन समूहका ५६ उद्यमीले यो तालिम पूरा गरिसकेका छन् भने ४५ सामाजिक उद्यमबाट १,१८४ जनाले रोजगारी प्राप्त गरेका छन् । अहिले चौथो समूहका २० उद्यमी तालिममा सहभागी छन् भने पाँचौं समूहका लागि देशभरबाट प्राप्त आवेदनमध्ये २० जना छनोट गरिनेछन् ।

कार्यक्रममा सहभागी हुन १८ वर्ष उमेर पूरा गरेको नेपाली नागरिक हुनुपर्नेछ । व्यवसाय सुरु गरिसकेका वा नवीन उद्यमशील विचार भएका व्यक्तिहरूले आवेदन दिन सक्नेछन् । आवेदन नबिल स्कुल अफ सोसल इन्टरप्रेनरसिपको फेसबुक पेजमा उपलब्ध क्यूआर कोड स्क्यान गरेर वा नबिल बैंकको वेबसाइटबाट फारम डाउनलोड गरी इमेलमार्फत पठाउन सकिन्छ ।

यो कार्यक्रमले जीविकोपार्जन, शिक्षा, स्वास्थ्य, सूचना प्रविधि, कला, सामुदायिक विकास, कृषि, ऊर्जा र दिगो विकासका लक्ष्यसँग सम्बन्धित क्षेत्रमा काम गर्ने उद्यमीहरूलाई प्राथमिकता दिन्छ । सहभागीहरूलाई अनुभवी मार्गदर्शक र उद्योग विशेषज्ञहरूबाट तालिम प्रदान गरिन्छ । नबिल एसएसईले उद्यमीहरूलाई व्यवसाय विस्तारका लागि आवश्यक स्रोत, सञ्जाल र वित्तीय पहुँचका अवसरहरू उपलब्ध गराउँदै आएको छ ।

नबिल एसएसई सामाजिक परिवर्तनको एक प्रभावकारी माध्यम बनेको छ। नबिल बैंकले संस्थागत सामाजिक उत्तरदायित्वअन्तर्गत यो कार्यक्रम विगत तीन वर्षदेखि सञ्चालन गर्दै आएको छ । हाल फेलोसिप प्रोग्राम र सर्टिफिकेट कोर्स सञ्चालित छन्, जसबाट ११७ उद्यम स्थापना भई १,२०० भन्दा बढी रोजगारी सिर्जना भएको छ ।

फेलोसिप कार्यक्रम त्रिभुवन विश्वविद्यालयसँगको सहकार्यमा चलिरहेको छ भने सर्टिफिकेट कोर्स सातै प्रदेशका ११ शैक्षिक संस्थामार्फत नबिल सेन्टर फर सोसियल इन्टरप्रेनरसिप स्थापना गरी सञ्चालित छ ।

नबिल बैंकले सामाजिक उत्तरदायित्वअन्तर्गत समाजमा सकारात्मक परिवर्तन ल्याउने लक्ष्यसहित विभिन्न कार्य गर्दै आएको छ । वित्तीय साक्षरता, उद्यमशीलता विकास, स्वास्थ्य, शिक्षा, विपद् जोखिम न्यूनीकरण, व्यवस्थापन र जलवायु परिवर्तनका क्षेत्रमा बैंकले विशेष जोड दिएको छ । यी प्रयासबाट हजारौं व्यक्तिको जीवनमा सुधार आएको र वातावरण संरक्षणमा पनि योगदान पुगेको बैंकले जनाएको छ ।

गोरखा, मंगलबार, २७ फागुन २०८१ । स्थापना दिवसको अवसर पारेर धार्चे गाउँपालिकाले आज मंगलबार सार्वजनिक बिदा दिएको छ ।

सार्वजनिक सूचना जारी गर्दै पालिकाले मंगलबार (फागुन २७ गते) पालिका अन्तरगतका कार्यालय, शैक्षिक संस्था, बैंक तथा वित्तिय संस्थाहरु बन्द हुने जनाएको छ ।

पालिकाको गत फागुन २३ गते बसेको गाउँकार्यपालिका बैठकले गाउँपालिकाको स्थापना दिवसको दिन बिदा दिने निर्णय गरेको थियो ।

पालिकाले आफ्नो स्थापना दिवस विविध कार्यक्रम गरी भव्य रुपमा मनाउन लागेकाले सार्वजनिक बिदा दिइएको प्रमुख प्रशासकीय अधिकृत काजिमान सुनारले बताए ।

गोरखा, आइतबार, २५ फ़ागुन २०८१ । शहिदलखन गाउँपालिकाले सार्वजनिक सडकको क्षेत्राधिकारभित्र निर्माण भएका संरचना तथा सडक अवरोध हटाउन आग्रह गरेको छ । पालिकाले सार्वजनिक सूचना जारी गर्दै सडकको क्षेत्राधिकारभित्र कुनै पनि संरचना निर्माण नगर्न र निर्माण भएको भए हटाउन आग्रह गरेको हो ।

‘गाउँपालिकाको सडक मापदण्डको क्षेत्राधिकारभित्र स्वीकृतिबिना संरचना निर्माण गर्ने, अनावश्यक रुपमा खाल्डो खन्ने, माटो थुपार्नेलगायत विभिन्न निर्माण सामाग्रीहरु सञ्चय गर्ने र सवारी आवत जावतमा बाधा पु¥याउने, सार्वजनिक सम्पत्तिको रुपमा रहेको सडकलाई बिगार्ने वा क्षति पु¥याउने कार्य नगर्न/नगराउनुहुन अनुरोध छ’, सूचनामा भनिएको छ ।

साथै, पालिकाले सडकको क्षेत्राधिकारभित्र कुनै पनि संरचना निर्माण गरेको भए उक्त संरचना चैत मसान्तभित्र हटाउन अनुरोध गरेको छ । संरचना नहटाए कानुनबमोजिम संरचना भत्काइ/हटाइ आवश्यक कारबाही गर्ने भन्दै पालिकाले सचेत गराएको छ ।

शहिदलखनको सडक मापदण्डअनुसार, मध्य र महत्वपूर्ण स्थानमा रहेको स्थानीय सडकको चौडाई ९ मिटर हुनुपर्दछ । ग्रामीण सडक अर्थात पालिकाको बस्तीहरुमा यातायात पहुँचका लागि बनाइएका सडकको चौडाई न्युनतम ६ देखि ७.५ मिटरको हुनुपर्दछ भने पालिकाको भित्र मुख्य मुख्य कृषि उत्पादन क्षेत्र र बजारलाई जोड्ने सडकको चौडाई न्युनतम ५.७५ मिटरको हुनुपर्ने मापदण्ड छ ।

गोरखा, आइतबार, २५ फागुन २०८१ । गोरखाको धार्चे गाउँपालिकाले अपांगता भएका व्यक्तिलाई आयआर्जनसंग जोड्दै स्वरोजगार बनाउन मुढा बन्ने तालिम प्रदान गरेको छ । पालिकाले ‘ग’ र ‘घ’ बर्गको अपांगता परिचय भएका व्यक्तिलाई छनौट गरेर १० दिने मुढा बुन्ने तालिम दिएको गाउँपालिकाकी उपाध्यक्ष सुनिला गुरुङले जानकारी दिनुभयो ।

‘‘अपांगता भएका व्यक्तिले केही गर्न सक्दैनन् भन्ने सोचाइ समाजमा छ, उहाँले भन्नुभयो, ‘‘त्यस्तो धारणालाई परिवर्तन गर्दै अपांगता भएका व्यक्तिलाई सीप प्रदान गरेर आत्मानिर्भर बनाउन तालिम दिइएको हो ।’’ गाउँपालिकाले तालिमपछि उनीहरुले उत्पादन गरेका मुढा वडावडामार्फत बजार व्यवस्थापनको पहल गर्ने उपाध्यक्ष गुरुङको भनाई छ ।

तालिममा लाप्राक, खोर्लावेशी, हुल्चुक, सिङ्लालगायतका बिभिन्न क्षेत्रका गरि १५ भन्दाबढीको सहभागिता रहेको थियो । ‘‘सामाजिक सुरक्षा भत्ता ‘ग’ र ‘घ’ बर्गका अपांगता भएका व्यक्तिले पाउँदैनन्, उपाध्यक्ष गुरुङले भन्नुभयो, ‘‘उनीहरुलाई केही न केही सीप सिकाउन सके आयआर्जनसंग जोड्न सकिने र आत्मानिर्भर बनाउन सकिन्छ भन्ने पनि हाम्रो विश्वास हो ।’’

गाउँपालिकाले धादिङबाट अपांगता भएका व्यक्तिलाई नै प्रशिक्षकका रुपमा ल्याएर तालिम प्रदान गरेको हो । पालिकाले आवासीय सुविधासहित सहभागीहरुलाई तालिम दिएको उहाँले बताउनुभयो । ‘‘सीप सिकेर मुढा उत्पादन गर्ने चाहानेहरुले आआफ्नो उत्पादन सम्बन्धित वडाका बजारमा बिक्रीका लागि व्यवस्था मिलाइने छ, उपाध्यक्ष गुरुङले भन्नुभयो, ‘‘वडाबाट बाहिर पठाउन परेपनि पालिकाले आवश्यक पहल गर्नेछ ।’’

तालिमले अपांगता भएका व्यक्तिलाई घरमै बसेर जिविकोपार्जनसंग जोड्न मद्दत पुग्ने उहाँले बताउनुभयो । धार्चे गाउँपालिका भित्र प्रसस्त मात्रामा निगालो पाइने भएकाले पनि कम लागतमा मुढा उत्पादन गर्न सकिने हुँदा मेहनत गरे सीप सिकेकाहरुले राम्रो आम्दानी गर्न सक्नेछन् ।

गोरखा, आइतबार, २५ फागुन २०८१ । जिल्लाको अजिरकोट गाउँपालिकाले दलित समुदाय लक्षित ‘जीविकोपार्जन सुधार कार्यक्रम’ संचालन गरेको छ । पिछडिएका दलित समुदायको जीवनस्तर उकास्ने उद्देश्यसहित जीविकोपार्जन सुधार कार्यक्रम संचालन गरिएको पालिकाले जनाएको छ ।

जीविकोपार्जन सुधार कार्यक्रम अन्तरगत दलित समुदायका व्यक्तिहरुलाई व्यवसाय संचालन रबिस्तारमा सघाउ पु¥याउने कार्यक्रम रहेको पालिकाकी रोजगार संयोजक सञ्जु लामिछानेले बताइन् । ‘पहिलेदेखि कुनै व्यवसाय गरेर बस्नु भएकाहरुलाई व्यवसाय सुधार र बिस्तारमा सघाउने कार्यक्रम छ’, उनले भनिन्, ‘व्यवसाय नगरेकाहरुको हकमा भने उहाँहरुको इच्छा अनुसारको व्यवसाय संचालन गर्न मद्दत गर्छौँ ।’ कार्यक्रमका लागी पालिकाले सात लाख रुपैँया बजेट बिनियोजन गरेको उनले जानकारी दिइन् ।

आर्थिक वर्ष २०८०/८१ मा समेत संचालन गरिएको सो कार्यक्रम निकै प्रभावकारी बनेकाले यो वर्षपनि निरन्तरता दिइएको पालिका अध्यक्ष दिपक देवकोटाले बताए । पालिकाभित्रका दलित समुदायमा पर्ने जोकोहीले कार्यक्रमका लागी आवेदन दिन सक्ने उनले जानकारी दिए ।

‘गत वर्ष अनुदान पाउनेहरु बाहेक अन्य जोकोहीले आ–आफ्नो वडा कार्यलयमा गएर आवेदन दिन सक्नुहुन्छ’, उनले भने, ‘फागुनभित्र वडामा आवेदन दिनुपर्छ । वडा कार्यालयले आवेदनहरु हेरेर आवश्यक छानबिन गरी पालिकामा सिफारिस गर्छ ।’ पालिकाले वडा कार्यालयहरुको सिफारिसका आधारमा लक्षित समुदायका व्यक्तिको जीविकोपार्जन सुधारका लागी कार्यक्रमहरु संचालन गर्ने उनको भनाई छ ।

पालिकाकी रोजगार संयोजक सञ्जु लामिछानेले गत वर्ष आएका आवेदनहरुमध्य ९० प्रतिशतले बाख्रा पालन छानेट गरेको बताएकी छिन् । ‘पालिकामा बाख्रा पालनको सम्भावना निकै राम्रो छ, त्यसैले पनि पोहोर छनोट भएकाहरुमध्य ९० प्रतिशतले बाख्रा पालन नै गर्नुभयो’, उनले भनिन्, ‘छनोट भएकामध्य बाख्रा पालन गर्न चाहानेलाई बाख्रा, सिलाईको काम गर्नेलाई मेसिन र आरनको काम गर्नेलाई आवश्यक औजार खरिद गरिदिएका थियौँ ।’ यो वर्ष पनि आवेदकहरुको इच्छा अनुसारका व्यवसाय संचालनमा पालिकाले सक्दो सघाउ गर्ने उनी बताउँछिन् । अबको डेढ महिनाभित्र आवश्य प्रक्रिया पुरा गरेर कार्यक्रम संचालन गर्ने उनले जानकारी दिइन् ।

काठमाडौँ, बिहिबार, २२ फागुन २०८१ । राष्ट्रिय सभाबाट सुशासन प्रवर्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश, २०८१ स्वीकृत भएको छ । बुधवारको राष्ट्रिय सभा बैठकले अध्यादेश स्वीकृत गरेको हो ।

अध्यादेशमा विपक्षी दलहरुको तर्फबाट अस्वीकृत गर्ने प्रस्ताव परेको थियो । तर राष्ट्रिय सभाले बहुमतले प्रस्ताव पारित गरेको छ । सरकारको तर्फबाट सञ्चार तथा सूचना प्रविधिमन्त्री पृथ्वीसुब्बा गुरुङले सुशासन प्रवर्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश, २०८१ लाई स्वीकृत गरियोस् भन्ने प्रस्ताव प्रस्तुत गर्नुभयो । प्रस्तावलाई बहुमत सांसदले स्वीकृत गरेको राष्ट्रियसभा अध्यक्षले सभामा घोषणा गर्नुभयो ।

सिड्नी, बिहिबार, २२ फागुन २०८१ । गैरआवासीय नेपाली संघ (एनआरएनए) को भगिनी संस्था नारी निकुञ्ज अस्ट्रेलियाले अन्तर्राष्ट्रिय नारी दिवस एक विशेष कार्यक्रमबीच मनाएको छ । नोरिस नेसन फाउन्डेसनसँगको सहकार्यमा सिड्नीस्थित लिभरपुलमा बृहत् अन्तर्क्रियासहित दिवस मनाइएको हो ।

कार्यक्रममा अस्ट्रेलियाका लागि नेपाली राजदूत चित्रलेखा यादवले महिलाहरूलाई प्रशासनिकसहितका अन्य क्षेत्रमा कार्यकारी पदमा ल्याउनुपर्ने बताउँदै विगतका संघर्षका दिनहरूको सम्झना गरिन् । उनले महिलाहरूलाई समान अवसर र नेतृत्वमा ल्याउन सके महिला अधिकार र सशक्तिकरणमा उल्लेख्य प्रगति हुने स्पष्ट पारिन् ।

कार्यक्रमकी अध्यक्ष एवम् नारी निकुञ्ज अस्ट्रेलियाकी संयोजक संगीता चापागाईंले उपस्थित अतिथिहरूलाई स्वागत गर्दै लामो समयदेखि संस्थाले महिलाहरूको उत्थानका लागि संस्थाले काम गरेको बताइन् । चापागाईंले मुख्यगरी पाठेघरको मुखको क्यान्सर, महिनावारी, प्रजनन् स्वास्थ्य समस्याका बारेमा नेपालका विभिन्न ठाउँमा सचेतनासहित सहयोगका काम गरिरहेको जानकारी दिइन् । उनले अस्ट्रेलियामा पनि विद्यार्थी र महिलाहरूलाई लक्षित गरी विभिन्न तालिम तथा कार्यक्रमहरू गरिएको स्पष्ट पारिन् ।

कार्यक्रममा एन्जाका अध्यक्ष कृष्ण तिवारीले आफ्नो संस्थाले अस्ट्रेलियामा रहेका समाजहरूलाई नियालिरहेको भन्दै त्यसमा पनि नारी निकुञ्जले गरेका सामाजिक कर्महरू प्रशसंनीय रहेको बताए ।

नोरिस नेसन फाउन्डेसनद्वारा सुरक्षित महिनावारी, सुरक्षित प्रसूति, गर्भावस्था, महिनावारी र महिला स्वास्थ्यसँग सम्बन्धित विभिन्न जानकारी र सचेतनामूलक प्रस्तुति राखिएको थियो । कार्यक्रममा एनआरएन अस्ट्रेलियाका अध्यक्ष अनिल पोखरेल, मनोचिकित्सक डा. घनश्याम चापागाईं, डा. राजु अधिकारी र लिभरपुल काउन्सिलकी काउन्सिलर फियोना म्याकनट, चरिश्मा कलियान्दा, नारी निकुञ्जकी संस्थापक संयोजक बबिता श्रेष्ठ, सामाजिक अभियन्ता इन्द्रा वन, कला संस्कृति तथा साहित्य प्रतिष्ठान अस्ट्रेलियाकी अध्यक्ष सुजाता बस्नेत केसी, नारी निकुञ्ज न्यू साउथ वेल्स राज्य संयोजक सबला बस्नेत, बरउड काउन्सिलकी काउन्सिलर सुकृति भट्ट लगायतको सहभागिता रहेको थियो ।

उक्त कार्यक्रममा नारी निकुञ्जकी संस्थापक सचिव जानकी पौडेलद्वारा लिखित रिलेसनसीप र कोरोना कहर पुस्तकको विमोचन गरिएको थियो । नारी निकुञ्जले प्रत्येक वर्ष प्रदान गर्ने उत्कृष्ट स्वंयसेवक पुरस्कार अग्रता रेग्मीलाई प्रदान गरिएको छ । कार्यक्रममा जेनिशा गौतम नेतृत्वको कलाकारहरूले नेपाली पहिरनमा सजिएर विभिन्न नेपाली संस्कृति झल्किने विभिन्न सांस्कृतिक प्रस्तुति दिएका थिए ।

गोरखा, मंगलबार, २१ फागुन २०८१ । उत्तरी गोरखाको धार्चे गाउँपालिका–२, स्थित केरौजामा सञ्चालित निःशुल्क स्वास्थ्य शिविरमा ७ सय ७४ जनाले उपचार सेवा लिएका छन् ।

दुर्गम भेगका नागरिकमा सहज स्वास्थ्य उपचारको पहुँच पु¥याउन गाउँपालिका स्वास्थ्य शाखाको आयोजनामा शिविर सञ्चालन गरिएको गाउँपालिकाका अध्यक्ष लक्ष्मण गुरुङले जानकारी दिनुभयो ।

शिविरमा १७७ जनाले स्त्री तथा प्रसुती रोगको उपचार सेवा लिएका छन् भने ३ सय ३४ जनाले नाक, कान र घाँटीको उपचार गराएका शिविर आयोजक समितिका संयोजक एवं मुटु फाउन्डेसनका अध्यक्ष धनबहादुर गुरुङ्गले बताउनुभयो । शिविरमा स्वास्थ्य जाँच गराएका मध्ये १५६ जनाले युएसजी, ७२ जनाले इसिजी सेवा लिएको उहाँको भनाई छ ।

ग्रीन सिटी हस्पिटल काठमाडौँको प्राविधिक सहयोग तथा मुटु फाउन्डेसन काठमाडौँ र मनोज एसोसिएसन फ्रान्सको आर्थिक सहयोगमा दुई दिने शिविर सञ्चालन गरिएको हो । केरौजा स्वास्थ्य चौकीमा भएको शिविरमा ११७ जना महिलाको पाठेघरको मुखको क्यान्सरको पूर्वपहिचानका लागि ‘भिआइए’ जाँच गरिएको गुरुङले बताउनुभयो ।

जसमध्ये १५ जनामा ‘भिआइए’ रिर्पोट पोजेटिभ देखिएपछि उनीहरुको थप परीक्षणका लागि नमुना संकलन गरी पठाइएको छ । त्यस्तै शिविरमा पाठेघर खस्ने समस्या भएका १० जना महिलाको पाठेघरमा ‘रिङ प्रेसरी’ राखेर उपचार गरिएको उहाँले जानकारी दिनुभयो ।

शिविरमा ग्रीन सिटी हस्पिटलकी बरिष्ठ स्त्रीरोगरोग तथा क्यान्सर विशेषज्ञ डा.अनिता थापा, नाक, कान तथा घाँटी रोग विशेषज्ञ डा.चेतना पाठक, अल्ट्रासोनोलिजिष्ट डा.विनोद शाह, जनरल फिजिसियन डा.प्रवेश गौतम, डा.निता जिसी, फ्रान्सेली डा.लोरेन्जलगायतका चिकित्सकको टोलीले उपचार सेवा प्रदान गरेका थिए ।

गाउँमै चिकित्सकबाट स्वास्थ्य जाँच गर्न पाएपछि स्थानीय नागरिक खुशी भएका छन् ।