Author: ipmsamachar

गोरखा, मंगलबार, १३ फागुन २०८१ । नेपाली कांग्रेसले स्थानीय तह समन्वय विभागमा गोरखाका राजु गुरुङलाई मनोनित गरेको छ ।

कांग्रेस सभापति शेरबहादुर देउवाले सिरानचोक गाउँपालिकाका निवर्तमान अध्यक्ष गुरुङलाई मनोनित गरेका हुन् । नेपाली कांग्रेसले सोमबार प्रेस विज्ञप्ति जारी गरी पार्टीको विधान, २०१७ (संशोधन सहित) को धारा २५ (९) बमोजिम पार्टीका केन्द्रीय सदस्य श्री मधु आचार्यको नेतृत्वमा विभाग गठन गरेको जनाएको छ। सो विभागको सदस्यमा गोरखाका गुरुङलाई पनि मनोनित गरेको विज्ञप्तिमा जनाइएको छ ।

साथै, अन्य सदस्यहरुमा गीता सत्याल (ललितपुर), उमा थापा (बाँके), विनोद यादव (महोत्तरी), रविन राई (मोरङ), हेमराज लामिछाने (चितवन), पुरुषोत्तम नेपाल(काभ्रेपलाञ्चोक), बाबुकृष्ण सापकोटा (धादिङ), गोरखबहादुर सुनार (जुम्ला), निर्प खड्का (कैलाली) रहेका विज्ञप्तिमा उल्लेख छ ।

सिरानचोक गाउँपालिकाका निवर्तमान अध्यक्ष राजु गुरुङले आफ्नो कार्यकालमा ऐतिहासिक गढीको संरक्षण र निर्माण, करोना नियन्त्रणमा गरिएको नमूना योग्य पहल, स्वास्थ्य तथा शिक्षा र खेलकुद क्षेत्रमा अब्बल गर्दै जनतासंगको सम्बन्ध अझै पनि ताजा नै रहेको छ ।

राजु गुरुङको राजनैतिक यात्राको शुरुवात बि. स. २०४६ साल देखि नेपाली कांग्रेसको भातृ संगठन ने.बि संघको श्री जनकल्याण मा.बि तल्लो गोहोरे, गोरखाको इकाई सचिब भएदेखि उहाँको राजनैतिक यात्राको शुरुवात भएको थियो । क्याम्पसमा अध्ययनरत हुदा पनि ने. बि॰ संघमा क्रियाशील रहेका थिए । गोरखा काठमाडौँ प्रजातान्त्रिक समाज, काठमाडौँमा पनि सदस्य पदमा रही काम गरिसकेका गुरुङ, नेपाली कांग्रेस पार्टीको १२ औ महाधिबेशनमा निर्बाचित नेपाली कांग्रेस पार्टीको तर्फबाट जिल्ला कार्य समिति, गोरखाको सदस्य र फेरी १३ औ र १४ औ महाधिबेशन पछि गुरुङ पुन: नेपाली कांग्रेस पार्टीको तर्फबाट जिल्ला कार्य समिति, गोरखाको सदस्यमा रहेर आफ्नो महत्वपुर्ण भूमिका निर्वाह गर्दै आइरहनु भएको छ ।

गोरखा, सोमबार, १२ फागुन २०८१ । गोरखाको शहीद लखन गाउँपालिकामा महाशिवरात्री विशेष कार्यक्रम हुने भएको छ । सन्तानेश्वर महादेव मन्दिर व्यवस्थापन संरक्षण समितिको आयोजनामा शहीद लखन गाउँपालिका ८ सन्तानेश्वर महादेव मन्दिरमा महाशिवरात्री विशेष कार्यक्रम हुने भएको हो ।

शहीद लखन गाउँपालिकाका अध्यक्ष रमेश बाबु थापा मगरको प्रमुख आतिथ्यतामा हुने उक्त कार्यक्रममा स्थानीय झाँकी, लाखेनाच, भ्याउरे, भजन, पञ्चेबाजा तथा बाल नृत्यसहितका विभिन्न सांस्कृतिक एवं धार्मिक कार्यक्रमहरू लगायत अन्य विभिन्न प्रस्तुति रहने आयोजकले जनाएको छ ।

आगामी फागुन १४ गते महाशिवरात्री पर्वका दिन बिहान ११:३० बजेदेखि कार्यक्रम सुरु हुने आयोजकले जनाएको छ ।

चितवन, सोमबार, १२ फागुन २०८१ । प्रेस चौतारी नेपाल बागमती प्रदेश अध्यक्षमा तिलकराम रिमाल चयन भएका छन् । चौतारीको बागमती प्रदेश समितिको सम्पन्न दोस्रो अधिवेशनले रिमाललाई सर्वसम्मत अध्यक्षमा चयन गरेको हो ।

त्यसैगरी समितिको उपाध्यक्षमा उज्ज्वल पौडेल, उपाध्यक्ष (महिला) तारा बस्नेत र महासचिवमा प्रकाश दाहाललाई चयन गरिएको छ ।

अधिवेशनले सचिवमा गोविन्द घिमिरे, लक्ष्मण घिमिरे, भोलाराज पौडेल, रूपक कोइराला र समावेशी सचिवमा नवराज श्रेष्ठ र जगमान तामाङलाई सर्वसम्मत रूपमा चयन गरेको हो ।

उपत्यका बाहेक बागमती प्रदेशका दस जिल्लाका प्रतिनिधि रहेका अधिवेशनले आगामी तीन वर्षको कार्यकालको लागि १७ जना सदस्य चयन गरेको छ ।

काठमाडौँ, सोमबार, १२ फागुन २०८१ । स्वीस भूगर्भशास्त्री टोनी हागेनले सात दशकअघि देखि खिचेका नेपाल चिनाउने तस्बिरहरूको पाँच दिने प्रदर्शनी शनिबारबाट दोलखाको जीरी नगपरालिकामा सुरू भएको छ ।

टोनी हागेन फाउन्डेसन र जिरी नगरपालिकाको आयोजनामा भएको तस्बिर प्रदर्शनीको हागेनकी छोरी डा. क्याट्रिन हागेनले उद्घाटन गरिन् । प्रदर्शनीमा राखिएका तस्बिरहरू अवलोकन पछि जीरी नगरपालिकाले स्वर्गिय हागेनलाई सम्झिएकोमा खुशी व्यक्त गरिन् । आफ्ना पिताले भ्रमण गरेको समय र अहिले जिरीमा धेरै परिवर्तन आफूले महशुस गरेको बताइन् ।

‘पहिले र अहिलेको जिरीमा धेरै परिवर्तन भएको छ, केही सकाकरात्मक र केही नकारात्मक’, उनले भनिन्, ‘यहाँ धेरै विकास भएको छ । कृषिमा मानिसहरूको सहभागिता घटेको छ ।भारत र चीनका कृषि उपजको उपभोग बढेको छ । यो त्यति राम्रो कुरा होइन ।’ जिरी नगरपालिकाका मेयर मित्र जिरेलले जिरीको विकासमा स्वीजरल्याण्डका जनता र सरकारको ठूलो सहयोग रहेको स्मरण गर्दै स्वीजरल्याण्ड र जिरीबीच घनिष्ट सम्बन्ध रहेको बताए ।

स्थानीय बुद्धिजिवी तथा जिरी माध्यमिक विद्यालयका पूर्व प्रधानअध्यापक टेक जिरेलले टोनी हागेनले जिरीलाई विश्वसामू चिनाउन र जिरीको विकासमा स्वीस सहयोग ल्याउन महत्वपूर्ण भूमिका निर्वाह गरेको बताए । पछिल्लो समय जिरी आन्तरिक पर्यटनको लोकप्रीय गन्तव्य बनिरहेको छ ।

फोटो प्रदर्शनी फागुन १४ गतेसम्म सञ्चालन हुनेछ । हाडजोर्नी विशेषज्ञ समेत रहेकी डा.क्याट्रिन ह्यागेन फागुन १३ र १४ गते जीरी अस्पतालमा निशुल्क स्वास्थ्य शिविरमा सहभागी रहनेछिन् । ‘नेपालको स्वीजरल्याण्ड’ भनेर चिनिने जिरीको विकासमा २०१३ साल देखि नै स्वीजरल्याण्डले सहयोग गरेको थियो ।

जिरीमा चीज फ्याक्ट्री, गाई अनुवांशिक प्रजनन केन्द्र, अस्पताल स्थापना तथा व्यवसायिक कृषि विकासका लागि स्वीजरल्याण्डको सहयोग रहेको थियो । पछि जिरी प्राविधिक शिक्षालयको स्थापना र सञ्चालन, जिरीमा एयरपोर्ट निर्माण र लामोसाँघु-जिरी सडक निर्माणमा स्वीजरल्याण्डले सहयोग गरेको थियो ।

टोनी हागेन २००४ सालमा मोहनशम्शेरको निमन्त्रणमा नेपालको विकासमा सहयोग गर्न पहिलोपटक नेपाल आएका थिए । पछि संयुक्त राष्ट्र संघका प्रतिनिधिका रूपमा र नेपाल सरकारका कर्मचारीका रूपमा उनले लामो समय नेपालका विभिन्न स्थानको भ्रमणमा बिताएका थिए । उनले खिचेका पुराना तस्बिरहरूको वृत्तचित्र ‘उहिलेको नेपाल’ युट्युबमा उपलब्ध छ ।

यस्तै, उनले लेखेका ‘नेपाल’, ‘विकेन्द्रीकरण र विकास’, ‘नेपालमा मेरो खोजयात्रा’ लगायतका पुस्तक प्रकाशित छन् ।

काठमाडौँ, आइतबार, ११ फागुन २०८१ । यती एअरलाइन्समा उडान भर्ने यात्रुहरुले क्रोकोडाईल लगेज तथा ब्यागप्याकमा हात खालि नजाने उपहार पाउने भएका छन् । क्रोकोडाइल लगेजका आधिकारीक विक्रेता देशैभरी रहेका छन् भने ब्राण्डको फ्ल्यागसिप स्टोर भने काठमाडौंको कान्तिपथ र ललितपुरको कुपण्डोलमा रहेको छ ।

फेब्रुअरी, मार्च र अप्रिल महिनामा यती एअरलाइन्स बाट यात्रा गर्ने यात्रुहरुले क्रोकोडाईल लगेजको खरिदमा ५० प्रतिशत सम्मको छुट प्राप्त गर्नेछन् । यती एअरलाइन्सबाट सन् २०२५ को कुनै पनि मितीमा उडान भरेका ग्राहकहरुले आफ्नो बोर्डिङ्पास क्रोकोडाईल लगेजका नजिकका आउटलेटमा जम्मा गरी यो छुट प्राप्त गर्न सक्नेछन् ।

यो छुट सन् २०२५ को डिसेम्बर ३१ तारिक सम्म रहनेछ । अनलाईनबाटै लगेज तथा ब्यागप्याक खरिद गर्न चाहने ग्राहकले भने क्रोकोडाईल लगेज नेपालको आधिकारीक फेसवुक पेज वा इन्स्टाग्राम पेज मार्फत खरिद गरि प्राप्त छुटको लागि डेलिभरीको समयमा यती एअरलाइन्सको बोर्डिङ पास ह्याण्डओभर गर्न सक्नेछन् ।

पाँच वर्षका वारेन्टी प्रदान गरिएका क्रोकोडाईल नेपाली लगेज बजारको नेतृत्वकर्ता ब्राण्ड भएको बताउँदै कम्पनीका निर्देशक वासु सर्राफ भन्छन्, “हामीले दोश्रो पुस्ताको रुपमा लगेजको ब्यापार गरिरहेका छौं । गुणस्तरीय उत्पादन र उपभोक्ता सन्तुष्टिका लागि हामीले निरन्तर गरेको मिहेनतको प्रतिफल स्वरुप आज हामीले बलियो ब्राण्ड इमेज बनाउन सफल भएका हौं ।” उनी थप्छन्, “उपभोक्तालाई अझ एफोर्डेबल प्राईस उपलब्ध गराउन सकियोस् भनेर ब्राण्ड सँग विशेष अनुरोधमा यती एअरलाइन्सका यात्रुहरुलाई हामीले यो छुट प्रदान गर्न सफल
भएका हौं ।”

यती एअरलाइन्स र क्रोकोडाइल लगेज विचको यो सहकार्यले यती एअरलाइन्सका यात्रुले पाउने विशेष छुटका अलावा प्रत्येक हप्ता क्रोकोडाइल ब्यागप्याक तथा प्रत्येक पन्ध्र दिनमा क्रोकोडाइल क्याविन लगेज उपहार स्वरुप जित्न सक्नेछन् । यती एअरलाइन्सले आफ्ना यात्रुहरु विच गर्ने लक्कि ड्र मार्फत विजेता घोषणा गरि उपहारहरु प्रदान गरिनेछ ।

१९४७ मा स्थापना भएको क्रोकोडाईल लगेज तथा ब्याकप्याकको ग्लोबल ब्राण्ड हो । सन् १९९८ देखि नेपाली बजारमा निरन्तर विक्री वितरण भईरहेको क्रोकोडाईल प्रिमियम उत्पादन र एफोर्डेबल प्राईसिङ्का लागि आम उपभोक्ता माझ लोकप्रिय रहँदै आएको छ ।

ललितपुर, आइतबार, ११ फागुन २०८१ । ललितपुर महानगरपालिका वडा नं १५ वडा कार्यालयले जेष्ठ नागरिकलाई सम्मान गरेको छ । ललितपुर महानगरपालिकाकी उप मेयर मन्जली शाक्य बज्राचार्यको प्रमुख आतिथ्यतामा सम्मान कार्यक्रम सम्पन्न भएको हो ।

प्रमुख अतिथि उप मेयर मन्जली शाक्य बज्राचार्यले सम्मानित ज्येष्ठ नागरिक सधैभरि सम्मानित नै हुनुहुने भएकाले सम्मानित व्यक्तित्वलाई सधै सम्मान गर्नुपर्छ भन्ने संस्कार हामीले हाम्रो समाजमा दिनुपर्ने धारणा ब्यक्त गर्नु भयो । साथै, उहाँले जबसम्म ज्येष्ठ नागरिक हामी माझ रहनु हुन्छ तबसम्म हाम्रो संस्कार, संस्कृति, धर्मको रक्षा हुने बताउनु भयो । ज्येष्ठ नागरिकको जीवन सहज, सुरक्षित र सम्मानित हुने अवस्थाको सुनिश्चित गर्दै उनीहरूको योग्यता, अनुभव, ज्ञान र सीपलाई सामाजिक विकासमा उपयोग गर्नु जरुरी रहेको बताउनु भयो ।

ललितपुर महानगरपालिका वडा नं १५ मा स्थायी रुपमा बसोबास गर्ने ६८ वर्ष उमेर पुगेका जेष्ठ नागरिकहरुलाई गत माघ १६ र १७ गते गोरखाको मनकामना मन्दिर र तनहुँको देवघाटमा धार्मिक तिर्थ भ्रमण गरी फर्किएका जेष्ठ नागरिकलाई आज शनिबारका दिन राष्ट्रिय प्रकृति संरक्षण कोष सातदोबाटो, ललितपुरमा सम्मानित गरिएको वडा अध्यक्ष सुरेश बहादुर शाहीले बताउनु भयो ।

समाजका सबै आदरणीय व्यक्तित्वसंग सहकार्य गर्दै सबैबाट साथ सहयोग रहेको स्मरण गर्दै वार्षिक रुपमा गर्दै आइरहेको ज्येष्ठ नागरिक सम्मान लाई निरन्तरता दिएको वडा अध्यक्ष सुरेश बहादुर शाहीले बताउनु भयो । साथै, उहाँले आज १ सय ५० जना ज्येष्ठ नागरिक लाई सम्मान गर्न पाउँदा हर्षित भएको र उहाँहरु आशिर्वादसहित सदैव समाजको लागि कार्य गने बताउनु भयो ।

उक्त सम्मानित कार्यक्रममा ललितपुर महानगरपालिका वडा नं १५ का वडा सदस्य वैकुण्ठ राउत, अनुप धिमिरे, निशा परियार, वसा सचिव सरन श्रेष्ठ लगायत अन्य अतिथि महानुभावको उपस्थिति रहेको थियो ।

काठमाडौँ, आइतबार, ११ फागुन २०८१ । अन्तर्राष्ट्रिय परिस्थितिको असर नेपालमा पनि पर्नसक्ने भन्दै सेनाले नयाँ रणनीति र समन्वय प्रणालीलाई समयानुकूल बनाउनुपर्ने निष्कर्ष निकालेको छ । बिहीबार र शुक्रवार आयोजित पृतनापति समन्वयात्मक बैठकबाट सो निष्कर्ष निकालिएको सैनिक अधिकारीहरू बताउँछन् ।

पृतनापति समन्वयात्मक बैठकपछि सेनाले पत्रकार सम्मेलन गरेर अर्धवार्षिक प्रगति विवरण सार्वजनिक गरेको छ । आइतबार जङ्गी अड्डामा आयोजित पत्रकार सम्मेलनमा युद्ध कार्य विभागका उपरथी प्रेमध्वज अधिकारीले भू–राजनीतिको असर नेपालमा पनि पर्ने र परिरहेको बताए । उनले भने– ‘त्यसमा कसरी अघि बढ्ने भन्नबारे अहिले चिन्तन गर्दैछौँ ।’

पछिल्लो समय अमेरिका र युक्रेनको बिचमा देखा परेको उतार–चढावले नयाँ प्रकारका सुरक्षा चुनौतीहरू सिर्जना हुनसक्ने सेनाको निष्कर्ष छ । सैनिक प्रवक्ता (सहायकरथी) गौरवकुमार केसीले अन्तर्राष्ट्रिय गतिविधि बुझ्ने र प्रभावबारे अध्ययन गरिरहेका बताएका छन् ।

फागुन ८ मा पृतनापति समन्वयात्मक बैठक उद्घाटन गर्दै रक्षामन्त्री मानवीर राईले पनि विश्वको विभिन्न स्थानमा चलिरहेको द्वन्द्वले नेपालमा पनि कुनै न कुनै रूपमा प्रभाव पार्ने बताए । उनले भनेका छन्, ‘जलवायु परिवर्तन र कृत्रिम बौद्धिकताले निम्त्याउन सक्ने चुनौतीहरूलाई सूक्ष्म रूपमा अध्ययन गर्नुपर्ने अवस्था छ ।’

बैठकमा सैनिक विभाग, महानिर्देशनालय, निर्देशनालयका प्रमुखहरू तथा पृतनापतिहरू सहभागी थिए । बैठकमा सिपाहीका समस्या र तालिममा गर्नुपर्ने सुधार लगायतका विषमा छलफल भएर सैनिक प्रवक्ता केसीले बताए । उनले भने– ‘पृतनापति समन्वयात्मक बैठकमा सेनाका समस्या र चुनौतीका विविध विषयमा छलफल भए ।’

बैठकलाई सम्बोधन गर्दै प्रधानसेनापति अशोकराज सिग्देलले विश्व सुरक्षा परिस्थिति बहु आयामिक दृष्टिकोणले थप संवेदनशील, जटिल र अन्योलपूर्ण भएको बताएका थिए । उनले भनेका थिए– ‘आन्तरिक र बाह्य परिस्थितिमा आउन सक्ने उतार–चढावले नयाँ प्रकृतिका सुरक्षा चुनौतीहरू सृजना हुने सम्भावना छ ।’

सिग्देलले भविष्यका सुरक्षा चुनौतीहरू सामान गर्न विभिन्न रणनीतिक तथा समन्वय प्रणालीलाई समयानुकूल विश्लेषण गरी प्रभावकारी उपायहरू पहिल्याउनुपर्ने बताएका थिए ।

गोरखा, शुक्रबार, ९ फागुन २०८१ । गोरखा नगरपालिकाको पर्यटन बर्षको अवसबर पारेर जेसिजहरु बिच बन्धुत्व भावना सिर्जजना गर्ने गरी गोरखा बजार क्षेत्रमा फुटसल आयोजना गरीएको छ ।

गोरखा जेसिज गोरखाले फेलोसिप अन्तरर्गत एरिया ‘बि’ को राष्ट्रिय निरुपीत उपाध्यक्ष अभिषेक दुलाल अन्तरर्गतका शाखाहरु बिच फुटसल गर्न लागेको गोरखा जेसिजका अध्यक्ष सुमन गुरुङले जानकारी दिए । उनका अनुसार यो शाखामा कुल १५ क्लबहरु भएता पनि १ महिलाहरुको भएकाले १४ क्लबको सहभागिता हुने उनले बताए । सबै क्लबका नयाँ सदस्य भएकाले परिचय र सामिप्यताको लागि पनि फुटसल सहयोगी हुने अध्यक्ष गुरुङले विश्वास ब्यत्त गरे ।

आउदो चैत्र १ र २ गते हुने फुटसल गोरखा नगरपालिका–९ को लक्ष्मि बजारको दल भञ्ज्याङमा रहेको खेलकुद मैदानमा हुने छ ।

अध्यक्ष गुरुङका अनुसार गोरखा सहित भानु बन्दिपुर, लमजुङ, ब्यास, शुक्ला गण्डकी, लेखनाथ, पोखरा, बालिङ, बागलुङ तथा माडीमा रहेको जेसिजहरुले फुटसलमा सहभागीता जनाउने छन् ।

‘राम्रो गर, राम्रो बन’ नारा दिएकाे फुटसलमा पहिलो र दोस्रो हुने समूहलाई नगद ५० र ३० हजार सहित ट्रफि, मेडल र प्रमाण पत्र प्रदान गरीने भएको छ । साथै खेलमा उत्कृष्ठ गोल रक्षक, डिफेन्डर, फेयर प्ले, गोलकर्ता र म्याच अफ दि टुर्नामेन्टलाई समेत नगद र प्रमाण पत्र प्रदानगरीने आयोजक गोरखा जेसिजले जनाएको छ । नक आउटको आधारमा हुने खेलमा ३ लाख ९० हजार खर्च हुने अनुमान गरीएको छ । सहभागी समूहले दर्ता शुल्क बापत ५ हजार शुल्क बुझाउनु पर्ने पनि आयोजकले जानकारी दिएको छ ।

काठमाडौँ, शुक्रबार, ९ फागुन २०८१ । गोर्खाली रग्बी क्लबको आयोजनामा गोर्खाली रग्बी सेभेन्स पुरुष राष्ट्रिय रग्बी प्रतियोगिता, गोर्खाली रग्बी ट्रफी आयोजना हुने भएको छ । गोर्खाली रग्बी क्लबले शुक्रबार पत्रकार सम्मेलन आयोजना गरी प्रतियोगिताको बारेमा जानकारी दिएको हो ।

प्रतियोगितामा सात प्रदेश, त्रिभुवन आर्मी क्लब, एपीएफ र एक आयोजक टिम गरी १० वटा टिमले प्रतिस्पर्धा गर्नेछन् ।

प्रतियोगितामा कुल १३५ जना पुरुष खेलाडीले सहभागिता जनाउने बताइएको छ । चितवनको भरतपुरस्थित कृष्णपुर रंगशालामा फागुन १६ र १७ गते गरी दुई दिन प्रतियोगिता आयोजना हुने गोर्खाली रग्बी क्लबले जानकारी दिएको छ ।

आयोजकका अनुसार प्रतियोगितामा प्रथम हुने टोलीले दुई लाख रुपैयाँसहित ट्रफी, मेडल र प्रमाण पत्र प्राप्त गर्नेछ । दोस्रो हुने टोलीले एक लाख रुपैयाँ, ट्रफी र मेडल पाउनेछ । प्रतियोगितामा २१ लाख रुपैयाँ खर्च हुने आयोजकको अनुमान छ ।

प्रतियोगिताका उत्कृष्ट खेलाडीलाई भर्दना काउचरबाट इटालियन सुट एक सेट प्रदान गरिनेछ ।

ललितपुर, शुक्रबार, ९ फागुन २०८१ । ललितपुर महानगरपालिका वडा नं १५ वडा कार्यालयले जेष्ठ नागरिकलाई सम्मान गर्ने भएको छ ।

ललितपुर महानगरपालिका वडा नं १५ मा स्थायी रुपमा बसोबास गर्ने ६८ वर्ष उमेर पुगेका जेष्ठ नागरिकहरुलाई गत माघ १६ र १७ गते गोरखाको मनकामना मन्दिर र तनहुँको देवघाटमा धार्मिक तिर्थ भ्रमण गरी फर्किएका जेष्ठ नागरिकलाई सम्मान कार्यक्रम राखिएको वडा अध्यक्ष सुरेश बहादुर शाहीले बताउनु भयो ।

साथै, उहाँले फागुन १० गते शनिबारका दिन बिहान ११ बजे रास्ट्रिय प्रकृति संरक्षण कोषमा कार्यक्रम राखिएको हुदा समयमा उपस्थित हुन आग्रह गर्नुभयो ।